ILOCANO

SAPAY NGA IPALUBOS TI DIOS ITI PANAGSAGABA?

TI LUBONG A NADIDIGRA ITI NATAOAN A PANAGSAGABA

Panagsagaba. Saan a macaay-ayo a banag a pagsasaritaan, ngem maysa a casapulan. Ti dicsionario isalaysayna iti panagsagaba cas casasaad a pacasugatan wenno pagsaeman ti maysa nga agsagaba; ti panagibtur iti ut-ut, sugat wenno pucaw (The New International Webster’s Comprehensive Dictionary).

Ti panagsagaba didigraenna ti lubong. Iti nagadu a langana samayennatayo iti pisical, saycolohical ken emosional. Uray pay ania ti pannacaiparangarangna, ti napaut a panagsagaba burborennat’ bagi ken espiritu.

Agpadpada dagiti nalinteg ken nakillo a pagdissuoran ti panagsagaba. Parigatenna dagiti awan-basolna a victimana. Daytoy macaalusais a kinapudno mangted ti paricut iti panangcamaysatayo iti nalawag a caawan-lintegna ken ti caadda wenno kinalinteg ti nasirib a nadiosan nga adda.

Adda dagiti dadduma a maburibor iti daytoy a casasaad dagiti ar-aramid ket gay-atenda a tarimanen ti casasaad. Aramatenda ti adu a pigsada nga agaramid cadagiti managited wenno managparabur nga ar-aramid a maiturong iti panangpabang-ar iti di-rebbbeng a panagsagaba. Il-iliwenda nga aramiden daytoy lubong a nalinlinteg ken nasalsalimeng a lugar a pagtaengan.

Ngem, nupay naimbag dagitoy nga ar-aramid, dagiti nasayaat a trabaho dida mawacnitan dagiti parparicut ti lubong. Agparparang nga iti bannogtayo a mangpasardeng iti panagsagaba iti casayaatanna agpaay laeng a pangitantan iti di-maatipa. Ket casla awan siasinoman, ti addaan iti papatien a pangilawlawag no sapay nga agpinget iti panagpatuloy dagiti nagadu a panagsagaba ti sangcataoan.

Ania ti sungbat? Sapay a ti panagsagaba awan lisianna? Sapay a saan a maidas-al laeng cadagiti carbenganna ti agsagaba? Sapay a dagiti awan-bibiangda agsagabada cadagiti tigtignay ken paspasamac a dida matengngel ken masansan dida masacbayan a makita.

Dagiti managpanunot ken filosofo inammirisda daytoy a banag iti adu a tawtawen, ngem dida naited iti macapnec a natanang a sungbat. Dagiti agrigrigat iti ut-ot – agraman dagiti adu a mangbasbasa iti daytoy a libreta – masapulda dagiti sungbat cadagitoy a salsaludsod.

ITI PAMINGMINGAN TI BIBLIA: NAPAYPAYSO KEN MACAPAKIRED-NAKEM

Usigentayo dagiti macagapu iti panagsagaba manipud iti biblical a pangmingmingan. Ti Saot’ Dios isu iti nasken nga ubbog a macatulong cadatayo a mangtacuat cadagiti rason nga agsagaba dagiti tattao.

Ti biblical a pamingmingan iti biag napaypayso ken macapakired-nakem. Ilawlawag ti biblia no sapay nga adda a cancanayon iti ut-ot cadatayo ken no sapay nga agtalinaed, iti bassit a tiempo.

Ket iti isu met la a tiempo macapakired-nakem met iti biblical a pangmingming, nangruna no palawaentayo ti panunottayo iti panangkita iti biag a mayannurot iti plano ti Dios ken ti panggepna para iti sangcataoan.

Ibaga ni Jesu Cristo cadatayo a ti nacaibaonanna iramanna ti panangidatunna cadatayo iti nawadwad a biag (Juan 10:10). Ibaga cadatayo ti Salmo 16:11 a “ti tulongmo [Dios] mangted iti agnanayon a rag-o.” Ipalgac met ti Biblia no casano ti panangpalag-an ti Dios cadagiti dadagsentayo ken no casano a ti panangpabang-arna dumtengto iti maysa nga aldaw iti entero a lubong. Ibagana met cadatayo iti tiempo iti ad-adayo pay a masangoanan inton natalipupos ti panagpucaw amin a panagsagaba.

Ngem saan a casta ti casasaad ti sangcataoan iti daytoy a panawentayo.

Naawatan ni Jesus a ti panagsagaba saan a maisina a paset daytoy pisical a biag. Impalagipna cadagiti pasurotna a “Ditoy lubong adda latta pacariribocanyo” (Juan 16:33).

SAAN PAY A PUMANAW TI PANAGSAGABA

Agpadpada a pagdas-alan ti panagsagaba dagiti nabacnang ken napanglaw, relihioso ken saan, bassit ken dackel. Iti daytoy a biag nagistay tunggal maysa mapadasanna dayta. Dagiti parparicut ti sakit ken salun-at casla gugoranda ti caaduan a tao iti dadduma a tiempo wenno iti sabali.

Cadagiti sigsiglo a naglabas dagiti sacsakit ti nangpataud iti nacaro a saem ken ut-ot. Ngem nupay adu ti nagdur-asan ti seyensia ti medicina ket casta unay ti cadackel ti immatiddogan ti minangay a panagbiag ammotayo a mataytayo pay laeng. Imbes iti panangpaababa cadagiti macapapatay a sacsakit ti biagtayo cadagidi nasapsapa a tawtawen, ita adu cadatayo ti pumosay iti ad-adu a tawen babaen cadagiti macaparigat a sacsakit cas iti canser ken sakit ti puso. Adu dagiti macapucaw iti panunotda adayo pay sacbay ti pannacarunot ti bagida.

Cadagiti nacurcurapay a nasion, ti panagsagaba ken pannacatay gapu cadagiti sacsakit a caaduan mabalin a maatipa nacadacdackel ti pagnaanna a pangidas-alanna iti nacaro a panagrigat ken kinaay-ay-ay.

Ti kinabarbaridad isut macagapu iti adu a panagsagaba ti panunot ken ti bagi. Awanen ti macaibaba iti tao iti narungsot a kinadawel no di iti gubat, ket ti tao cancanayon latta a cadangdangadangna ti padana a tao. Idi sumagmamano a tawen ti naglabasen dagiti mannurat iti pacasaritaan ti lubong, da Will ken Ariel Durant insuratda nga iti 3,421 a tawtawen iti naisurat a pacasaritaan ti lubong “268 laeng ti saan a nacakita iti gubat” (The Lessons of History, 1968, p. 81).

Ti gubat saan laeng a pagtaudan ti patay ken macaidalit a sugsugat cadagiti pagbabacalan no dipay saem ti puso, pannacadadael ti familia ken kinapanglaw. Mangimula cadagiti bucbukel ti panaggiginnura nga agpaut iti adu a sigsiglo. Impadto ni Jesus a ti panawen apaman a sacbay ti panagsublina macaimatang iti cadackelan a panagsagaba iti isuamin a tiempo, caaduanna ti agtaud iti gubat (Mateo 24:6, 21-22).

Calpasan ti kinaalingget dagidi gubgubat idi umuna a gudua ti maica-20 a siglo ken ti sangalubongan a pannacawarawara nga inaramidda, ninanam ti sangcataoan ti minangay a pannacabang-ar gapu ta dagiti gubgubat nanipud idin nagdas-alda cadagiti naipattopattoc a luglugar iti nataoan a casasaad a mangidiaya iti adu nga agpaut a namnama nga agpaay iti masacbayan.

SADINO TI CANCANAYON NGA ADDAT’ PANAGSAGABA

Idissuor ti panagsagaba iti cadackelan a panangdidigrana cadagiti tattao a nacurapay cadagiti dipay nagdur-as a pagilian. Cadagiti adu a pagilian dagiti tattao marigatanda pay a maaddaan iti umanay a canenda. Napaliiw ti Current Events magasin a di pulos agpatingga ti panagbisin: “Mapattapatta a 800 riwriw dagiti tattao – caaduan cadacuada dagiti ubbing – agsagabada iti panagsamay ti cancanayon a bisin,” ken “35,000 dagiti ubbing a matay inaldaw-aldaw cas pagbanagan dagiti casasaad a naisinggalut iti nacurapay a pannangan.”

“Ta cancanayon nga adda dagiti napanglaw iti dennayo...” kinuna ni Jesus (Mateo 26:11). Nacadagdagsen ti kinapudnona a daytoy saan laeng a cadagiti naisulinec a kinapanglaw idiay Africa, Asya ken Latina America, no di ket ngangani sadinoman a lugar. Ti macagapu iti ad-adda a kinadakes ti caadda ti nacaro a panagcurang iti pannacataraon caaduan daytoy a kita ti panagsagaba ket maliclican.

Kinaawan calidad dagiti politico, kinaruker dagiti pangpangulo, gubat ken napardas a panagadu dagiti tattao ken panagcurang ti taraon rubrubanda ti panagbisin. Saan a husto a wagas ti panagtalon ken kinacurang ti pagiluganan ken sistema ti panagiwaras ti canen isu dagitoy ti mangtulong iti nacaro a panagcurang ken panagbisin nga aramid-tao. Casta met nga adda paset nga ipaay dagiti casasaad a di-matengngel ti tao.

Ti bisin ken sakit isudat paricut a dumegdegdeg uray no adda agballigi a maipacat a mabiit a pangpagin-awa. Impadto ni Jesus iti tiempo ti riribuc a dipay dimdimteng a mapasamac cadagiti “maudi nga al-aldaw” a pacairamanan ti sapasap a panagbisin. Impadtona dagiti “panagbisin, ang-angol, ken ginggined cadagiti nadumaduma a lugar” (Mateo 24:7).

Ang-angol ti sakit – masansan a cacuycuyogna ti panagbisin. No agdissuor dagiti managdadael a ginggined, aglalo cadagiti napanglaw a nasion, dagiti naracrac a daldalan ken rangrangtay pagsardengenda ti panagayus ti taraon nga agturong cadagiti nadidigra a luglugar. Saan a mabayag rugiananen dagiti sacsakit ken bisin ti mangpapatay cadagiti tattao.Nupay dagiti gubgubat agparangda cadagiti daulo ti pagiwarnac, ti bilang dagiti matay agsipud cadagiti panagdadangadang dagiti armada bassit laeng no maidilig cadagiti matay iti sakit. Sigun cadagiti dadduma a pammattapatta, ti AIDS, maminsangapulo a daras ti patayenna idiay laeng Africa ngem dagiti matay cadagiti gubgubat iti entero a lubong.

TI TAO IGAGGAGARANA TI AGIWARAS ITI PANAGSAGABA

Nupay ta nacadacdackel ti bilang dagiti matay gapu iti kinacurang ti taraon ken sacsakit, ti nacaro a kinaagum mangidateng ti ad-adu pay a panagsagaba. Ti panangadipen, cas pangarigan, isut duogan ken naipagarup a napucawen nga aramid, ngem agtalinaed a maysa a canser cadagiti adu a pagilian.

Ti Current Events ipalawagna dagiti numero: “...Ad-adu ngem 200 riwriw dagiti adipen nga agbibiag ditoy lubong cadagitoy nga aldaw – ad-adu ngem iti aniaman a tiempo iti pacasaritaan ti lubong. Ti magasin Time inlanadna a “sagsangapulo a riwriw dagiti tattao iti aglawlaw ti lubong, agraman dagiti ubbing cas caubing ti innem a tawen, dagiti agtartrabaho nga adipen – napeggad ken nacaal-alas a casasaad a masansan ti 18-oras nga aldaw ti panagtrabahoda, mapangpang-orda ken maabusarda iti secsual.”

Adu pay, nupay saanda a mapilpilit, dagiti agbibiag iti nagistay kina-adipen, naipalab-ogda cadagiti casasaad ti economia ken atiddug nga oras ti panagtrabaho idinto ta bassit-usit ti matgedanda a pagbiagda. Dagita cacasta a casasaad racrakenda ti espiritu ti tao. Sirmataenyo man iti biag nga awanan ti rag-o, iti kina-adda nga awan a pulos ti panangnamnama ken panangnanam dagiti tattao iti bassit a ragsac a macangngeg iti napintas a musica, ti ragsac ti nasayaat nga angaw, ti panangricna iti baro a cawes wenno ti liwliwa iti natalged a pagtaengan.

Ti kinaagum ginasgasut dagiti di-mapuotan a wagwagas a macapapatay. Dagiti agtagtagilaco ibanbandoda dagiti tagilacoda a macadadael iti salun-at ket pagangayanna patayendatayo. Dagiti agpabpabuya ken dagiti pagbuyaan idurdur-asda dagiti agbucbucod, napa-langguad a wagas ti panagbiag a pacaipamaysaan iti di-agbayag a ragsac nupay ta iti camaudianan dadaelenda ti personal a panaglangenlangen ken perdienda dagiti gundaway para ti napaut a kinaragsac. Dagiti dadduma a negocio, pammartuatan ken gobierno sabidonganda ti angin, daga ken danum cadagiti sabidong kemical a mangipangta iti salun-at ken talingengen. Agtultuloy latta ti listaan.

AGBALIW CADI ITI LADAWAN?

Idi immay ni Jesu Cristo ditoy daga dua a melinia ti napalabasen, nakitana iti bingayna iti rigat. Naimatanganna ti casasaad dagiti naicarsia nga agcucutel, dagiti balo a macasapul iti tulong ken dagiti tattao nga agmauyong. Casta unay ti panangngaasina ket nagtignay a mangpabang-ar iti kinacacaasida.

Narangarang iti pangicaso ken panangngaasi ni Jesus idi silalayang ti panagsangitna idi umasideg iti Jerusalem iti camaudian ti tiempona (Lucas 19:41-44). Masirmatana ti rigat nga idateng ti gubat iti ingungotenna a siudad ken dagiti tattaona idi 70 CC (Calpasan Ni Cristo) ti panagalsa dagiti Judio agbanag iti pannacalacub ti siudad, ket nacaal-alingget ti nagbanaganna.

Indariragna a paset ti nacaibaonanna ti “panangagasna cadagiti masacsakit, panangwayawayana cadagiti balud, pannacakita manen dagiti bulsec, pannacaruc-at dagiti maparparigat” (Lucas 4:18). Iti casta a tiempo dipay napagteng para ti amin a sangcataoan, ngem icarcari ti Dios a gibusannanto ti sapasap a panagsagaba inton agturay ni Cristo iti sangaribu a tawen ket pucawennanto ida a namecpeclan (Paltiing 21:4).

Cadagiti sumarsaruno a pahina ductalantayo no casano ken inton caano ti pannacapasamac daytoy. Ngem, tapno maawatan no casano ti panaggibus ti panagsagaba, masapul a maawatantayo no casano ti panagrugina – ken no sapay nga agtultuloy.

SAPAY A TI AGAY-AYAT A DIOS IPALUBOSNA ITI PANAGSAGABA

Ti taga-Britania a mannurat [ti pacasaritaan ti lubong] Paul Johnson insuratna maipapan iti maysa cadagiti cadackelan a paricut teolohical iti librona The Quest for God. “Inapec a ti paricut ti kinadakes ad-adu ti abugenna a managpanunot a tattao nga umadayo iti relihion ngem ti aniaman a sabali a kinaricut” insuratna (1996, p. 61).

Adu a tao ti mamati a no ti Dios napaypayso nga isu ti Dios iti ayat ken asi pagrebbenganna babaen ti mismo a cababalin ken principiona nga atipaen ti panagsagaba ditoy lubong. Mangted daytoy iti nasayaat a saludsod. Sapay a di bumallaet ti Dios a mangatipa iti panagsagaba?

Ti kinadakes nga ipalubos ti Dios, ken dagiti didigra a pilienna a saan nga atipaen, iturongna ti adu [a tattao] a mangriri iti kinasirib, kinaimbag ken uray iti caadda ti Dios. Dagiti dadduma nga ateista ibagada ti kinaagpayso ti kinadakes cas casayaatan a rasonda iti panagsisinnuppiat maipapan iti caadda ti Dios. Insawang ni Julian Huxley a ti caadda ti kinadakes “isut pangcarit iti cababalin-moral ti Dios” (Religion Without Revelation, 1957, p. 109).

Inkeddeng ni Huxley nga awan iti nadiosan a pammaltiing ken ti nadiosan a Mammaltiing. (Para iti pammanecnec a talaga a napaypayso ti Dios ken ti ebolusion falso, kiddawenyo ti libre a libretami Ti Cangatoan a Saludsod Ti Biag: Adda Cadi Dios? ken Panamarsua Wenno Ebolusion: Nasken Cadi No Ania ti Patienyo?

Sapay nga ipalubos ti Dios iti kinadakes? Siasinoman a nacaricna iti ut-ot wenno nacapadas iti didigra masdaaw maipapan iti daytoy. Dagiti teolohiano, filosofo, mannarita [ti pacasaritaan ti lubong] ken seyentista tiningtingitingda daytoy a banag. Utobentayo ti dadduma a pangngeddengda.

TI DAKES A DIOS MAIBUSOR ITI NAIMBAG A DIOS

Ti gnostico a mannursuro a ni Marcion idi maicadua a siglo, naidarirag nga eretico gapu cadagiti pamingminganna, patienna nga “adda agsinsinnalip a dua a Dios: maysa, ti naranggas a mammarsua ken mangmangted-linteg iti Daan a Tulag; ti sabali, ti-di-ammo a Dios ti ayat ken asi a nangibaon ken ni Jesus a manggatang iti pannacaisalacan manipud iti Mammarsua a Dios” (Webster Encyclopedia, One Volume edition, 1985, p. 561).

Iti pamingmingan ni Marcion ti mangmangted-linteg a Dios isut makinrebbeng iti caadda ti ut-ot ken kinadakes, ket ti trabaho ti Mangisalacan isu ti panangispalna iti lubong manipud iti ut-ot ken kinadakes a pinataud dayta a Dios. Daytoy biddut a panagkita binaliwan ken pinasayaat dagiti dadduma ket nagin-inut a nagramut iti uneg ti bagi ti doctrina ti cadackelan-nga-ayus ti iglesia, a ti panangguyugoyna ti nangtaraken iti riribuc ken di-pagkikinnaawatan agingga cadagitoy nga aldaw.

Adu dagiti mangipagarup a bumallaet a mangdusa ti napungtot a Dios tunggal bumaddectayo iti ruar ti uges, idinto ta ti kinaagpaysona sapasap ti panangipalubosna cadatayo nga agsagaba cas nagbanagan ti mismo a kinaimbucodan, curang-panangmatmat a cababalintayo (kitaenyo ti Jeremias 2:19; 10:23). Caaduan ti tao ti di-macabigbig a ti Dios saan a mismo a bumallaet tunggal agbasoltayo; a dagiti linlinteg espiritual nga insaadna nga agtigtignay maipatpatungpal latta a mangted iti pannusa no labsingentayo ida.

ARAMID CADI DAYTOY TI DIOS?

Dagiti mannurat [ti pacasaritaan ti lubong] nagsursuratda maipapan iti daytoy casla agsupadi a lubong a pinarsua ti Dios ngem napno iti kinadakes. Napaliiw ni Arnold Toynbee a taga-Britania a “maysa cadagiti pangngeddeng nga inyaon dagiti nataoan nga agbuybuya iti moral a kinadakes ti Universo ket daytoy siled nga ayan dagiti nacaal-alingget a bambanag saan a mabalin nga aramid ti Dios” (A Study of History, abridged version, 1957, Vol. X, p. 300).

Bigbigen ni Toynbee a caaduan cadagiti panagsagaba ti lubong gapuanan dagiti naranggas nga agtuturay. Ipakita ti Nasantoan a Surat a mabalinan ti Dios iti mangiccat cadagiti dakes a tattao iti turayda (Daniel 2:21). Pinagpacumbaba ken innicatna ni Ari Nebucadnesar ti Babilonia, ti cabilegan nga agturay iti daydi a panawenna. Nacadacdackel ti turay ni Nebucadnesar ta “pinabitayna ti siasinoman a kinayatna” (Daniel 5:18-19). Nupay casta impababa ti Dios ket naawan ti panangguyugoy [turay]na iti pito a tawen.

Sapay ngarud a saan a sansanen ti Dios nga aramiden daytoy? Ni Nebucadnesar, idi caarngedan ken capalangguadanna, pinataudna laeng ti bassit a paset ti rigat nga indas-al dagiti dadduma a dictador nga agtuturay iti daytoy capanawenantayo.

Ni Fisicista Paul Davies, ut-utobenna ti daytoy bangir ti pagsisinnuppiatan a kinaimbag maibusor iti kinadakes. Ut-utobenna iti pagsasaritaan no sapay a ti Dios, no napaypayso a Mannacabalin-amin, basta bumallaet la coman ket pasardengenna amin a kinadakes. “Siwayawaya cadi ti Dios a mangatipa iti kinadakes?” Nasdaawan ni Davies. “No Mannacabalin-amin, wen. Sapay ngarud nga agkibaltang a mangaramid?” (God and The New Physics, 1983, p. 147).

Adda rason ti saludsod ni Davies. Awanan-gaway cadi ti Dios iti sangoanan ti panagsagaba? No Isu ket adda, sapay a saan nga agtignay a mangiccat cadagiti dakes ken ut-ot ti rabaw ti daga? Macariribuc dagiti salsaludsod, ngem saan a gapu iti kinaricut ti pannacaawat cadacuada. Macapaalusaisda gapu ta dagiti sungbat saan a cas iti pagayatantayo.

Ti kinapudno daytoy a banag pilitennatayo a mangbaliw cadagiti capanunotantayo maipapan iti Dios ken ti planona ken panggepna para cadatayo. Inton maawatantay dagidiay, maawatantayto nga adda rason ti Dios iti dina panagtignay itan.

ITI DACDACKEL A PANGGEP?

Sapay a saan a basta iparit ti Dios iti kinadakes? Tapno maawatan ti sungbat, ammirisen-tayo ti pagbanagan nga idateng ti casta nga aramid.

Iti pannacaawat no sapay nga ipalubos ti Dios iti kinadakes ken ti pagbanaganna a panagsagaba masapulna ti capunganayan a pannacaawat iti maysa cadagiti naindaclan a sagut ti Dios – casta met no casano iti di-agsarday a panangabuso ti tao iti dayta a parabur.

Ti sagut isu ti siwawayawaya a pagayatan – wenno cas iti nalatac a pannacaawagna, wayawaya iti panagpili. Inted ti Dios daytoy a wayawaya cadagidi immuna a tattao a nagannac cadatayo, da Adan ken Eva, idi panamarsua. Ngem iti panaglabas dagiti milenia [rinibu a tawtawen] pinanecnecantayo ti kinaliwaytayo a manarawidwid iti daytoy napateg a sagut ken ti nacadacdackel a pagannungantayo.

Cas iti panangilawlawag ti Dios iti duogan nga Israel, ti wayawaya nga agaramid iti panagpili masapul unay iti panangidur-as iti nalinteg a cababalin (Deuteronomio 30:15-19). No awan ti wayawaya nga agpili, agbalintayo a casla tirtiris, a ti cababalintayo naisaaden ken di-mabalbaliwanen wenno maidictar amin nga ibinsabinsa ti addat’ruar a bileg a cas iti Mismo a Dios.

Ngem saan a casta ti ranta ti Dios. Adda naisupadi a namnamana cadatayo gapu iti nangatngato a panggepna para cadatayo. Tarigagayanna a pilientayo iti panagtulnog Kencuana nga aggapu iti puso. Cayatna ti sigagagar a panagayat ken panagragsactayo cadagiti pammateg ken pagrucodanna, a naibatay iti dua a pangringbawan a principio – ti panangayattayo Kencuana iti amin a pusotayo ken panangayattayo cadagiti sabsabali [a tattao] a cas ti panagayattayo iti bagitayo (Mateo 22:35-40).

Cas makitatayto, ti panangpili iti panagtulnogtayo iti Dios ken panagsursuro iti panagayattayo cadagiti sabali idinto ta adda wayawayatayo nga agaramid iti casumbangirna napangruna para iti masacbayan nga isagsagana ti Dios para cadatayo.

NAGDUDUMA A TUCAD TI PANAGARAMID ITI PANGNGEDDENG

Cadagiti amin a parsua nga inaramid ti Dios, to tao laeng ti macainsayo iti siwawayawaya a pagayatan. Dagiti nababbaba a kita ti biag, cas cadagiti micorobio ken insecto, naisaaden ti pannignayda cadagiti nasinnunuo a wagas cadagiti nasinnunuo a panagricnada. Agtignayda a mayannurot iti aglawlawda ket ngangani awan a pulos ti nawayawaya a baelda nga agaramid iti pangngeddeng a cas iti maaramid ti tao.

Dagiti pannignay dagiti naricricut ti biagda a kita, cas cadagiti mammalia [animales], ad-adda nga iturayan ti naisiguden a panunotda [instinct], nupay ta macaaramidda met cadagiti casisigud a pangngeddeng no pagtignayanda iti addat’ruar a mangpatignay cadacuada ken ti mayannurot a panagtignayda cadagiti casasaad [ti aglawlawda].

Ti laeng tao iti addaan ti napadur-as a puot iti tiempo. Cuna ti Eclesiastes 3:11 a ti Dios “inniccannatayo iti tarigagay a mangammo iti masacbayan.” Iti sabali a pannao, mabalintayo a panunoten iti masacbayan. Macaaramidtayo cadagiti adayot’ madanonna a pangngeddeng ken maplanotayo ti biagtayo cadagiti bulbulan ken tawtawen a masacbayan a panagbiagtayo.

Adalentayo met ti naglabas; adda puottayo iti pacasaritaan [ti lubong]. Masursurotayo dagiti lecsion cadagiti padpadastayo ken capadasan dagiti sabsabali. Cadagiti amin a pisical a pinarsua ti Dios ti laeng tao ti inniccanna iti bael nga agaramid cadagiti umun-una a pangngeddeng.

Tinabas ti Dios dagiti nataoan a parsua nga agaramid cadagiti panagpili. Nupay casta, ditay pulos nasursuro no casano ti panagaramid iti agtultuloy a nasirib ken naparbeng a pannacaammo nga agpili. Casta met a ditay nasursuro no casano ti kinasamay ti pannarawidwidtayo cadagiti ricricna, tigtignay ken tartarigagaytayo ken dagiti panangallucoyda cadagiti pangngeddengtayo.

TI IMMUNA A PANANGIPACAT ITI WAYAWAYA NGA AGPILI

Ti wayawayatayo nga agpili no aniat’ cayatttayo nga aramiden mabalin nga agbanag iti naimbag wenno dakes nga aramid. Inniccannatayo ti Dios iti agpadpada a panangidiaya iti tulong iti padatayo a tao ken ti wayawaya nga agtignay iti cabucbucodan a wagwagas a macadangran cadatayo ken dagiti sabsabali.

Masansan nga ipacattayo ti wayawayatayo nga agpili cadagiti biddut a wagas, ket apitentayo dagiti bungana – iti langa dagiti di-ninamnama a pannusada. Saan a cabarbaro daytoy; damo a napasamac idiay Hardin ti Eden cada Adan ken Eva.

Nangisaad ti Dios ti dua a cayo iti uneg ti minuyongan. Maysa ti cayo ti biag ken ti sabali ti cayo ti pannacaammo iti naimbag ken dakes (Genesis 2:9). Imbaga ti Dios ken ni Adan a mabalinna ti mangan iti immun-una, ngem saan a mangan iti naud-udi: “Imbagana iti lalaki, ‘Mabalinmo ti mangan iti bunga ti uray ania a cayo iti hardin malacsid ti bunga ti cayo a mangted iti pannacaammo iti naimbag ken iti dakes. Masapul a dimo canen ti bunga dayta a cayo; no manganca, matayca iti dayta nga aldaw’” (versiculo 16-17).

Cas ilawlawag ti libro ti Paltiing, iladawan ti cayo ti biag nga iti panagtulnog iti Dios agturong iti camaudianan iti agnanayon a biag (Paltiing 2:7; 22:1-2). Ti sabali a cayo, ti cayo ti pannacaammo iti naimbag ken dakes – iladawanna ti panangiwacsi iti wagas [dalan] ti Dios. Daytoy a pili agtungpalto iti ipapatay.

Ni Eva, babaen iti pannulisog ti uleg, impacatna a simamaag ti wayawaya ti pagayatanna ket naallilaw (2 Corinto 11:3). Inrasonanna iti panangicalilisna iti pannursuro ti Dios. Nupay ta ibaga ni Apostol Pablo cadatayo a saan a naallilaw ni Adan (1 Timoteo 2:13-14), pinalubosanna ti asawana a nangguyugoy kencuana a makiraman kencuana nga agsukirda iti Dios (Genesis 3:17).

Ti entero a pannacaammo ni Adan cadagiti pannignayna isut nangpacaro iti panagbasolna para iti napasamac. Isu ti ad-adda a pinabasol ti Dios ngem ni Eva. Numan pay casta, nagtiponda a nangpili iti panangipangag ken panangsurotda iti uleg (Genesis 3:1-6), nga insalaysay dagiti Escritura a cas Diablo ken Satanas (Paltiing 12:9).

Inapit da Adan ken Eva ti bunga ti basolda. Imbaga ti Dios cadacuada a mataydanto – ket napasamac a casta – ngem ti dagus a nagbanaganna pinapanaw ti Dios ida iti hardin ket linapdanna ida iti cayo ti biag.

Ita magnada a bucbucod iti naricut a lubong (Genesis 3:22-24). Nabatida iti bucodda a nagettangan a sirib – ti bucodda a pangngeddeng (versiculo 6). Manipud iti dayta a punto ti biag iramanna iti ladingit, ut-ot ken bannog gapu iti panagsukirda a maibusor iti nacalawlawag a pannursuro ti Dios (versiculo 16-19).

NAISAAD ITI TABAS

Calpasan ti mano a ribu a tawtawen insurat ni Apostol Pablo a “naituding nga agbalin nga awan serserbi ti amin a naparsua” ken “ iti nacatagabuanda a panagrupa” (Roma 8:20-21). Awan panagalindua nga ipatpatuldona dagiti casasaad a nagrugi cadagiti paspapasamac idiay Eden. Nanipud idin “Nagbasol amin a tao” (Roma 3:23; 5:12) ket inapitda dagiti pannusa a natgedan da Adan ken Eva.

Adu ti tao a manggura iti Biblia agsipud ta iramanna nga isalaysay dagiti dakes a cadawyan dagiti tattao. Iraman ida iti Nasantoan a Surat gapu ta isu ti pacasaritaan iti managbasol a wagas ti biag a pinili ti tao idi inidiaanna dagiti bilbilin ti Dios ket inapitna dagiti napataud a bungana.

Impaltiing ti Dios iti pannacaisurat dagiti lecsion iti Daan a Tulag tapno macasursurotayo cadagiti padpadas dagiti sabsabali (1 Corinto 10:6, 11). Nupay ta iraman ti Baro a Tulag ti cacasta a lecsion para cadatayo, ti caaduan a pacaituronganda iti mensahe maipapan iti Pagarian ti Dios ken ti naimbag a damag iti panangibaon ti Dios iti Anacna a mangisalacan cadatayo cadagiti bas-basoltayo (Juan 3:16). Ipalgacna met no casanonto iti panagsardeng ti panagsagaba ken panagladingit.

TI PANAGPILI CADAGITI BENDISION WENNO PANNACAILUNOD

Nganngani 2,500 tawen ti naglabasen calpasan da Adan ken Eva, indatag ti Dios iti mamatmatan a pacabang-aran dagiti Israelita iti panagsagaba. Inrugi ti Dios ti nakipagtrabaho cadacuada idi baludda pay laeng idiay Egipto. Incarina a saanna la a wayawayaan ida iti pannacaadipenda no dipay ket iccanna ida iti gundaway nga agbalin a pagtuladan a nasion a cayat dagiti sabsabali a pagulidanan (Deuteronomio 4:5-8).

Cas paset ti catulagan ti Dios cadacuada, agbalindanto a managtulnog a tattaona (Exodo 19:5). Binilinna ida cadagiti sangapulo a napangruna a puntos ti agnanayon, espiritual a lintegna – dagiti Sangapulo a Bilin (Exodo 20). Nangted cadacuada cadagiti nainayon a linlinteg ken pagannurotan, nga intay masaracan cadagiti libro nga insurat ni Moises (dagiti Pentateuk).

Iti dayta a linteg, kinunana cadacuada, “Tungpalenyo ida a sipapasnac tapno maiparangarang cadagiti tattao cadagiti sabali a pagilian ti kinasiribyo. Inton madamagda amin dagitoy a linteg, cunadanto, ‘Masirib ken mannacaawat unay daytoy a naindaclana a nasion!’” (Deuteronomio 4:6).

Imbaga ti Dios cadagiti Israelita nga adda wayawayada nga agpili iti dua a wagas ti panagbiag. “Awagac ti langit ken ti daga a mangsacsi iti pilienyo. Pagpiliencayo iti biag wenno patay, iti bendision wenno iti lunod. Ngarud, pilienyo ti biag tapno agbiagcayo ken dagiti caputotanyo. Ayatenyo ti APO a Diosyo, agtulnog ken agtalinaedcayo a napudno Kencuana ta Isu ti biagyo ken naunday nga al-aldawyo...” (Deuteronomio 30:19-20).

Impacaammona cadacuada a no agtulnogda apitenda ti adu a bendision (Deuteronomio 28:2), ngem no agsukirda mailunodda (versiculo 15). Adu dagiti lunlunod nga imbaga ti Dios nga agtaud iti kinasukir (versiculo 15-68) a maipada cadagiti ut-ot ken panagsagaba a nangracrac cadagiti cabaroanan a nasion. Adu cadagitoy a riribuc ti mangsamay iti entero a nasion. Adu dagiti personal a panagrigat, agpada a pisical ken iti panunot.

Nacaledleddaang ta, ti Israel nagsukir ket inapitna ti nabuntuon a rigat nga impadto ti Dios. Nairaman cadagitoy dagiti didigra iti panagtalon, kinapanglaw, parparicut ti familia, dakes a salun-at, crimen ken kinarungsot, pannacaabac militar ken camaudianna pannacabalud.

Calpasan ti nawatiwat-a-sigsiglo iti panangpadpadasda iti wayawaya nga agpili – nga iti las-udna cancanayon latta a pilienda ti di-mangicaso iti Dios ket inkeddengda nga aramiden dagiti bambanag iti bucodda a wagas – naisublida manen iti casasaad iti nailian a pannacaadipen.

GAPU KEN SAMAY: MASANSAN A LISIAN A KITAEN

Masansan a padasen ti Dios nga ipasimudaag iti tao ti nasken unay a principio a tunggal samay adda gapuna. Ngem adda ricuttayo a mangammo iti kinapudno, ket agtultuloy ti panagsagabatayo iti macaidalit a samay dagiti salungasingtayo.

Maipatuldotayo nga adu cadagiti pannacadidigra ken panagsagabatayo agtaudda cadagiti bucod-a-nataoan a tigtignay ken pangngeddengtayo. Iti lubong ti wayawaya ti panagpili, ti dadduma a pili di-bumurong nga agturong iti macadangran ken naut-ot a pagbanagan.

Dagiti tigtignay agbungada. Adu ti tao a mangbigbig iti pagsasao, “Apitento ti tao ti aniaman nga imulana,” ngem dida ammo a naggapu daytoy iti Biblia (Galacia 6:6-7). Rinibu a tawtawen iti naglabasen idi maysa cadagiti gagayyem ni Job – a saanen a ganggannaet iti panagsagaba – napaliiwna “a dagiti agaramid iti dakes, dakes met la ti apitenda” (Job 4:8).

No ammirisentayo ti banag ti panagsagaba, adu ti masursurotayo no surotentayo a talun-tonen dagiti paspasamac cadagiti nagtaudanda. Ti Proverbio 23 ballaagannatayo nga utoben-tayo dagiti nawatiwat-a-pagbanagan dagiti pannignaytayo: “Makita ti nanakem ti dumteng a riribuc ket liclicanna, ngem sumaracusoc ti nengneng ket agabawi calpasanna” (Proverbio 22:3).

No birukentayo dagiti cadackelan a gapu ti panagsagaba, masansan a saantayon a cumita iti ad-adayo ngem ti mismo a bagitayo – iti kina-entero dagiti pangngeddeng ken tigtignay ti tunggal tao ken ti sangcataoan. Iti maysa a wagas wenno sabali, iti basol gagangay nga isu ti capunganayan a cagagapu, ket ti panagsagaba iti samayna.

DAGITI CAGAGAPU ITI RIGAT

Dagiti nasion ken tunggal tao agsagabada iti adu a rigat gapu ti kinanengneng ken kinasukirda cadagiti isu met laeng nga espiritual a linlinteg ti Dios a nagsukiran dagiti Israelita. Dagiti bilbilin ti Dios sibibiag a linlinteg, nga addaan sangalubongan a pannacaipacat, a mangted iti bendision para ti kinatulnog ken pannusa para kinasukir.

Dagiti napaltiingan a sasao ti Dios ibagana cadatayo a dagiti mangayat iti lintegna maaddaanda iti “naindaclan a cappia” (Salmo 119:65), ngem naricut ti dalan ti kina-awan linteg ken ti saan a mapagtalcan (Proverbio 13:15).

Ipatuldo ti Biblia dagiti adu a naririgat a padpadas ti tao cas nagbanagan iti basol. Maysa a pagarigan iti casta isu ti panagraut-militar. Nagsurat ni Apostol Santiago maipapan iti puon ti naigaman a panagririri: “Ania ti pagtaudan dagiti panagaapa ken panagriririyo? Aggapuda cadagiti dakes a tarigagay a canayon nga agbibinnusor iti unegyo. Calicagumanyo ti maaddaan cadagiti bambanag ngem diyo matagicua ida, ket sidadaancayo a pumatay. Naagumcayo ngem awan magun-odyo, isut gapuna a makiriri ken makicabilcayo. Diyo maala ti cayatyo gapu ta dicay met agdawat iti Dios” (Santiago 4:1-2).

Dagitoy a sasao maipacatda cadagiti nasion casta met cadagiti tattao, yantangay dagiti nasion basta bunggoy laeng dagiti tattao nga cumitkita iti bucodda a pagimbagan. Dagiti dumarup a nasion mapanda makigubat ta nayonanda ti bileg, kinatalged ken kinabacnangda. Ti panagaramidda iti casta, iwalinda ti linteg, moralidad ken cappia. Pumapatay ken mangdangranda tapno ipadur-asda ti pagimbaganda, ipacatda ti principio a ti bileg-agbalin-a-linteg ken ti pagsasao a ti mangabac cucuana ti masamsam.

Naawatan ni Will Durant daytoy a nataoan a pagduyosan idi insuratna: “Dagiti pagtaudan ti gubat pareho met laeng cadagiti pagtaudan ti panagsasalisal dagiti tattao: panagala [iti sanicua], kinabileg ken kinapalangguad; ti panagayat iti canen, daga, materiales, sungrod-crudo, kinapangulo” (The Lessons of History, 1968, p. 81).

Ngem, dagiti nasion a sitatallaugod a mangpili iti kinarungsot, agraman ti gubat, masansan a tawidenda ti [kinadacsang]gasat dagiti pagilian a pinarmecda. Naawatan ni Jesus daytoy idi kinunana: “Idulinmo dayta campilanmo agsipud ta ti mangaramat iti campilan matayto iti campilan” (Mateo 26:52). Ti pacasaritaan [ti lubong] isut pacasaritaan ti panagsisinnublat dagiti emperio a nangparmec ken naparmec. Naiculbo ti sangcataoan iti di-agressat a pannacaulit dagita nga ar-aramid no agtalinaed latta iti panangpilina iti wagas iti kinasurkirna iti Dios.

ADDA PAGBANAGAN DAGITI PANGNGEDDENG

Adu a kita ti panagsagaba ti basta di-maliclican a pagbanagan dagiti personal a pangngeddeng. Cas pangarigan, cadagiti adu a nagdur-as a nasion agtultuloy ti napattopattoc a kinacurapay numan pay riniwriwriw a dolyar ti magasgasto a pangparmec iti daytoy a paricut.

Masansan a daytoy kinacurapay masurotan ti nagtaudanna cadagiti pangngeddeng ti tao. Agsardeng dagiti agad-adal, putdenda ti adalda ket agtinnagda laeng cadagiti naricut a panggedan iti entero a panagbiagda, nababa a tangdan, kinarigat ti cuarta ken napaay nga ambision.

Adu dagiti agcabanuag naalicutegda iti kinaderrep, riniwriwriw dagiti dumalaga a agipas-ngay iti ruar ti callaysa cadagiti maladaga a didanto pulos makita dagiti ammada. Ipakita dagiti dagiti panangadal a dagiti ubbing a binaybay-an dagiti ammada iti nasapa nga edadda, ad-adu ti panagturongda cadagiti druga, panaginum ken panagtabaco, masursuroda ti cababalin-kriminal ken panagbalin iti kinapalalo ti kinaderrepda, ket idas-alda ti panagsagaba cadagiti bagida ken cadagiti sabsabali a tattao.

Adu dagiti ubbing-nga-inna – masansan a di-nagcallaysa gapu ta dagiti amma [dagiti annacda] intarayanda ti pagannunganda – masaracanda ti bagbagida a naipalab-og iti panggedan a nababat’tandana idinto ta adda dagiti ubbing a taraonanda ket mapilitanda nga agpannuray cadagiti maipadawat cadacuada, masansan nga aggapu iti gobierno wenno cadagiti balay-ti-asi, tapno agbiagda.

Daytoy a tabas maulit-ulit a di-agsarday cadagiti nacurapay a caputotan nga agsasaruno – masansan a maigapu iti ababa-a-panagkita cadagiti personal a panagpili ken panagtignay.

SALUN-AT KEN DAGITI PILI

Saan a maibaga dagiti paricut iti salun-at a mangdiddidigra cadatayo gapu cadagiti pangngeddeng ti tunggal maysa cadatayo. Nacurapay ti pannangantayo, ditay mangwatwat, agibustayo cadagiti macadangran nga an-anag ken ditay alluadan ti pannacadangrantayo ken dagiti sabsabali babaen cadagiti disgracia. Adu dagiti agsagaba iti sakit ti panunot cas banag ti panaglabsing cadagiti principio a mangituray cadagiti pannakilangenlangen a silalawag nga ibaga ti Biblia.

Dagiti parparicut iti pisical ken saycolohical agtaud iti panagabuso cadagiti arac ken dadduma pay a druga. Dagiti cacasta nga abusador dida laeng ipeggad ti pannacakissay ti tawen ti mismo a biagda, ngem dagiti ug-ugalida mangicarangucong iti dackel a pagdacsan dagiti familia ken gagayyemda. Ad-adda pay a kinadacsanggasat, adu dagiti abusador ti mairaman cadagiti acsidente a manglungpo wenno mangpapatay cadagiti awanan-basol nga agtactacder laeng iti igid ti dalan.

Natibker ti pammanecnec a ti pannacadangran iti bagi agtaud iti panagtabaco [panagsigarilyo]. Dagiti sacsakit a mayugnay iti panagpayubyob ipusayna ti 400,000 a biag tunggal tawen iti Estados Unidos ken adu pay a riwriw iti sangalubongan. Adu cadagita a pannacatay ti nacasasaem ken nacapapaut. Sidadaantayo a mangaclon a ti casayaatan nga agas para ti ladingit a pinataud ti panagpayubyob isu ti basta panangisardeng, ngem adu dagiti nacaro ti pannacaigalutdan ket cagurada daytoy a solusion.

Ti panagpayubyob maysa la cadagiti adu a cadawyan a pagtaudan ti ut-ot. Insurat ni Dr. Paul Martin dagiti casla di-macadangran nga ug-ugali maurnongda bayat ti panaglabas ti tiempo: “Nawadwad dagiti cagagangayan a tabas dagiti ug-ugali a mangpapatay cadagiti tattao a main-inut a ngem adu ti bilangda [dagiti matay]” (The Healing Mind, 1997, p. 58).

Masansan a no agaramidtayo iti saan a nainsiriban a pangngeddeng iti salun-at ballaagannatayo ti bagitayo a nacaaramidtayo iti dakes a panagpili. Napaliiw da Paul Brand ken Philip Yancey nga “iti nacakelkellaat nga apag dagiti parparicut ti salun-at agtaud manipud cadagiti ug-ugali ti panagpili a mangipakita iti di-panangicaso cadagiti nalawag a pagilasinan iti bagi” (The Gift Nobody Wants, 1993, p. 226).

Impalawag ni Dr. Brand nga “iti dackel a panagiinnuman iti nailian a salun-at, inrugina ti listaan dagiti nacaro nga ug-ugali a mayugnay cadagiti parparicut ti salun-at a nacaro ti panangsamayda iti salun-at dagiti Americano. Inramanda ti sakit ti puso ken alta presion a pinacaro ti dagensen, ulser ti tian, dagiti canser a nayugnay iti macasabidong nga aglawlaw, AIDS, STD, emfesima ken canser ti bara a nagtaud iti panagpayubyob, pannacadangran ti sicog gapu ti panaginum ti ina iti arac ken druga, diabetes ken dadduma pay a sakit a mayugnay iti [di-husto] pannangan, narungsot a crimen, acsidente iti lugan gapu ti pannacabartec. Dagitoy dagiti sacsakit a pacasecnan dagiti agcacalaing iti salun-at iti Estados Unidos” (Brand and Yancey, pp. 226-227).

APITENTAYO TI IMULATAYO

Nalawag coma ti paggibusanna. Adu dagiti panagsagaba ti bunga dagiti biddut a panagpili. Mangidiaya ti Biblia iti pangiwanwan no casano coma ti panagbiagtayo. Ngem nanipud pay idi cada Adan ken Eva inulit-ulittayon nga inidiaan iti pannursuro ti Dios ket indas-altayo ti nacaad-adu nga ut-ot ken ladingit iti bagitayo.

Mangidatag ti Biblia iti pammagbaga maipapan ti amin a paset ti biag. Adu cadagiti principiona ti mangipalgac no casano ti panangatipa – ken no dadduma mangpabang-ar – iti panagsagaba. (Nagurnongcami ti adu cadagitoy a pangiwanwan iti libreta a napauloan Casano Ti Panagandar Ti Biag [Making Life Work] a mangipakita a nasaysayaat ti panagandar dagiti bambanag no basta ipacattayo dagiti principio nga ipalgac ti Dios iti Saona. Dawatenyo ti copiayo iti oficinami a caasitgan cadacayo, wenno alaenyo manipud iti Website ti www.gnmagazine.org).

Saantayo a mabalin ti agbiag a siwawayawaya iti panagsagaba aginggat’ makicaycay-satayo iti Dios ken cadagiti bilbilinna. “Anacco, dimo liplipatan dagiti linlintegco. Italimengmo dita pusom dagiti bilbilinco; ta napaut ken narang-ay ti panagbiag ti itedto kenca ti pannursuroc” (Proverbio 3:1-2, nainayon ti panangigunamgunam).

No tungpalentayo ti pannursuro ti Dios iti nailian a tucad, makitatayo ti dagus ken nadaras a panagbaba ti crimen, sacsakit, panaggiginnura dagiti nasion, pannacagamer ti tangatang ken daga, disgracia, sakit ti panunot, naracrac a familia, nadadael a panagcacadua ken adu a sabsabali a bambanag a pagtaudan ti panagladingittayo. Saan a naranggas wenno macapadagsen ti linteg ti Dios. Isut linteg ti wayawaya (Santiago 1:25)) a mangpucaw iti caaduan nga ut-ot ditoy lubong no sapasap coma ti pannacatungpalna.

CASANO TI ITATAUD TI IMBAG ITI PANAGSAGABA

Ni Sigmund Freud nagtrabaho cas mammagbaga iti pannacaispal dagiti tattao iti saycolohical a parparicutda. Nupay casta sipupudno ti panangaclonna nga adda pagpatinggaan ti tulongna. Impudnona nga “inagasanna ti rigrigat dagiti neurotico {agsakit ti panunotda) ngem inlucatna met cadacuada dagiti gagangay a rigat ti biag” (Ernest Becker, The Denial of Death, 1973, p. 271). Husto ni Freud: Awan ti casta a banag a cas iti biag nga awanan iti riribuc.

Idinto ta ditay maliclican amin a panagsagaba, italimengtayo iti panunottayo a mabalin ken masansan a macapartuattayo cadagiti naimbag a pagbanagan. Nalaclaca nga ibturan ti panagsagaba ken ut-ot no mingmingantayo ida a cas carit ngem iti panangpanunottayo cadacuada a cas di-masbaalan a lunod.

Nagtinnawintawidan a doctrina ti Makinlaud a cultura, ket husto nga adda dadduma a ricricut a pagimbagan ta macatulongda a mangpatangken cadatayo nga agbalin a nasaysayaat a tao. Nupay casta, ni mannurat Richard Kyle ipalagipna cadatayo a caaduan ti Europa, Britania ken Estados Unidos simrecda iti calpasan-ti-Cristiano a panawen a “ti Cristianidad saanen nga isu ti mangisalaysay cadagiti cultural a pammateg” (The Last Days Are Here Again, 1998, p. 25).

Ti calpasan-ti-Cristiano a casasaad-ti-nakem iwacsina ti tradisional a biblical a pamingmingan a ti kinarigat ken ut-ot – nupay di-macaay-ayo ken di-cayat – macapagbalin iti imbag iti camaudianan. Dagiti panangyebcas a cas iti “Babaen ti natibker a panagtacderyo magun-odyo ti biag” wenno “Gapu ti panagibturyo, maisalacanyonto dagiti bagiyo” (Lucas 21:19) ken “Masapul nga aglasattayo iti adu a rigat iti iseserrectayo iti Pagarian ti Dios” (Aramid 14:22), nupay ta pudno, saanen a nalatac ti pannacaaclonda.

Silalawag nga isursuro ti Biblia a dagiti rigrigat macapatanurda cadagiti bunga a pagimbagan. Numan pay ta ni Cristo isu ti Anac ti Dios, “nasursurona ti agtulnog babaen dagiti sinagabana. Idi naaramid nga awan pagcuranganna, nagbalin a pacaisalacanan nga agnanayon dagiti amin nga agtulnog Kencuana” (Hebreo 5:8-9). Uray ti pacasaritaan sekyular macaited cadagiti pagtuladan a tattao ken nasnasion a, babaen cadagiti pacapilitan a casasaad, naparmecda dagiti nariricut a casasaad iti pannacaragpatda iti kinadackel ken kinalatac. No dadduma ti maysa a naganetget a tao macaited iti rissic a casapulan dagiti nasion iti panagibturda cadagiti carigatan a tiempo ken iti pananggun-odda cadagiti naindayawan a bambanag.

TI PRIMO MINISTRO SIBIBILEG A NAGPAAY ITI PAGILIANNA

Napaliiw ni Apo John Keegan a pudno daytoy ken ni Winston Churchill ken iti Britania idi Maicadua a Gubat Sangalubongan. Idi 1940, iti las-ud ti casipngetan nga al-aldaw ti riribuc, situtured a nangacay cadagiti maparparmec a tattao. “Iti panagsasaruno dagiti naisangsangayan a panagbitlana, a nagun-unnoy cadagiti tattaona a pakiredendat’ nakemda ken ti masarsarita a kinadackelda, intugotna ti Britania kencuana.” Babaen cadagiti nabibileg a sasaona, “indagadagna ti pagayatanna ken arapaapna cadagiti cacailianna” (U.S. News & World Report, May 29, 2000).

Napatibkerda babaen ti kinapinget ti Umuna a Ministroda, naanduran dagiti Britonio ti panangbegbeg cadacuada dagiti eroplano luffwaffe ni Hitler iti Dangadang Ti Britania ket nagbalin ti tiempo ti pannacasuot ken dumdumteng a pannacaabac iti panagballigi nga inawagan ni Churchill a “caimbagan nga oras” iti pagilianna.

Insurat ni Keegan a dagiti Britonio, nga addat’ babaen ti pannacaraut, “nameclanda a pagulidanan no casano ti panagbiag iti caimbagan nga oras. Kinalida dagiti natay ken sibibiag a nagaburan cadagiti narnarba a pasdec, sinalacnibanda dagiti applayada [ken] pinairutanda dagiti barikesda” (ibid.).

Napaliiw ni Will Durant a “ti carit a naisayangcat a sibaballaigi – inyaltasna ti ricna ken saad ti pagilian, ket pinagbalinna a macabael a mangisayangcat cadagiti ad-adu pay a carcarit” (The Lessons of History, 1968, p. 91).

Ipasimudaag dagiti padpadas ti Britania ti pannacasapul ti panagtitimpuyog ken panagtitinnulong bayat ti panagrigrigat. Ibaga ni Dr. Brand no casano ti panagsaganana iti capalaloan ti rigat: “Ti casayaatan a banag a mabalinco nga aramiden iti panagsaganac para iti ut-ot isu ti pananglicmutco iti bagic cadagiti naayat a caarruba a makipagtacder iti sibayco no agdissuor iti didigra” (Brand and Yancey, p. 236). Nariparna a “saan[mo] a maibturan ti panagsagaba no awan ti mangisakit [kenca]” (p. 257).

Ipalgac ti Dios nga itugot ti panagsagaba ti natan-oc a panggep: Matulongannatayo a dumackel iti incabsatan nga ayat. “Agtitinnulongcayo iti pacadagsenan ti tunggal maysa tapno matungpalyo ti linteg ni Cristo” (Galacia 6:2).

No ti panangicasotayo agayus a maiturong cadagiti sabsabali, ti panagsagaba, a di-cayat ken naut-ot, mabalin a pammadas a macaited iti pagimbagan. Masursurotayo iti kinaagpayso a “No madusatayo, ipagaruptayon iti dayta a canito a saan a pagragsacan, no di ket pagladingitan. Ngem iti camaudiananna, awaten dagiti nairuam iti casta a pannacadisiplina ti natalna a gunggona ti nalinteg a biag” (Hebreo 12:11).

TI PANANGSANGO CADAGITI PACARICUTAN

Ti pammati a ti panagrigat macaibunga ti adu a pagimbagan nganngani nagpucawen iti Makinlaud a cultura. Caaduan a nasucatanen iti capanunotan a ti panagsagaba wenno aniaman a di-macaay-ayo saan a naincalintegan ket masapul a liclican iti aniaman a pamay-an.

Nalabit daytoy a capanunotan impatawid cadatayo ti panagbiag iti nadaras-pannacatarimaan-a-gimong a mangisuro a carbengantayo iti maaddaan iti pildora iti tunggal an-annayen ken nadaras a pangiwacnit iti tunggal paricut. Paset met daytoy iti mentalidad-bictima – ti panagmadi a mangibaclay iti pagannungan para iti bucod a pannignay wenno casasaad – a macapacapsut iti gimong a sumuco iti dayta. Ti gimong a mangbigbig a no dadduma saan a naincalintegan ti biag ken nasinnunuo a saan a nalaca – ken situtured a mangsaranget iti carit ad-adda a napigsa.

Iti cabaroan a pamingmingan, nacaam-ames iti ut-ot, maysa a cabusor a masapul a liclican. Mamatmatantayo a casta, wenno mamatmatantayo a cas pammallaag a masapul a baliwan ti cababalintayo. No saantayo a maliclican, nalabit maaclontayo ti caritna ket agbalintayo a napigpigsa, nasaysayaat a tao.

No dadduma bassit ti cabaelantayo no di laeng ibturan ti pannacasuot ket palubosantayo a paraniagenna ti cababalintayo. Ni mammagbaga Norman Wright insuratna a “ti rigat saan a canayon a dakes. Mapagbalin a pangbaw-ing iti biag a sumayaat... Icuycuyogna ti gundaway ti panagdackel ken panagbalbaliw” (How To Have a Creative Crisis, 1986, p. 15).

Ipalagip ti Biblia cadatayo a cadagiti pannuot masapul nga ilabes ti panagkitatayo iti agdama ket ipamaysa ti panagkitatayo cadagiti mabalin a pagimbagan: “Tapno naan-anaycayo ket awan pacapilawan ken pagcuranganyo, masapul nga agtalinaedcayo iti kinaanusyo nga agibtur” (Santiago 1:4).

DIYO IPALUBOS A TALIPUPOSENDACAYO DAGITI PANNUOT

Saanmi a sasaoen nga agsagaba ti maysa [a tao] no maliclicanna. Ngem, no ditay maliclican, masapul a sursuroentayo no casano ti panangtengngel iti panagsagaba ken, no masapul, aclonentayo. No ditay sursuroen nga aramiden daytoy, mabalin nga agtungpal dagiti pannuottayo cadagiti daddadackel a paricut no agaramidtayo cadagiti panagpili a macabalbaliw-biag cas bunga ti sicur a pinartuat dagiti pannuot.

Cas insurat ni Dr. Martin, “Ti dagensen ken panagsensennaay...macaatipa iti pannaturog ket ad-adda a pagduyosendatayo nga agpayubyob, agbartec, mangan iti nalabes cadagiti di-umisu a canen, malipatantay ti agagas, mabaybay-antay ti mangwatwat, aginum cadagiti druga, agderrep cadagiti napeggad a cababalin secsual, agpataray iti nacarpardas a di-agusar iti barikes-tugaw, madisgracia wenno agpacamatay” (The Healing Mind, 1998, p. 55).

Ti nangato a bilang dagiti agpacamatay cadagiti adu a nasion iladawanna ti awan-bael dagiti tattao a mangaclon iti kinaricut ti biag.

TI MENSAHE ITI NAIMBAG A DAMAG

Ibaga ti Biblia cadatayo nga ipalubos ti Dios iti panagsagaba tapno agpaay iti nadiosan a panggep. Ammo dagiti Cristiano a ti Mangisalacan cadacuada, ni Jesu Cristo, nagsagaba ken natay para cadacuada ket iti casta masapul a surotenda ti tugotna, a pacairamanan ti panagsagaba (1 Pedro 2:21). Inibturan ni Jesus iti rigat ken ipapatay tapno pacawanennatayo ti Dios cadagiti basbasoltayo ken iccannatayo iti agnanayon a biag, ket makipagturaytayto ken ni Cristo (Paltiing 5:10). Ti pannacaammotayo iti daytoy ti mangpabael cadatayo a mangsaranget cadagiti rigrigat ti biag.

“No macaibturtayo,” ipalagip ni Pablo cadatayo, “makipagturaytayto met Kencuana. No cunatayo a saantayo nga am-ammo, cunananto met a dinatay am-ammo” (2 Timoteo 2:12). Agsublinto ni Cristo ditoy daga nga agturay – ket iti camaudiananna pagpatinggaenna ti panagleddaang ken panagsagaba.

Ti mensahe ni Jesus maysa a capunganayan a naimbag a damag a naipamaysa iti Pagarian ti Dios (Marcos 1:14-15) nga ipasdecto ni Cristo inton agsubli. Isaadnanto ti tiempo ti sangalubongan a cappia ken ragsac. Impadto ni Isaias iti cappia ken rag-o iti dayta dumteng a Pagarian: “Awanto ti macadangran wenno dakes idiay Sion a nasantoan a bantay ti Dios. Agsacnapto iti daga ti pannacaammo iti APO, cas iti panagsacnap ti danum iti baybay” (Isaias 11:9).

No maisublinto iti sangcataoan ti pannacaammona iti Dios, agsardengton ti ut-ot nga imbunga ti panangsursurottayo iti diablo imbes ta iti Dios. (Para iti ad-adu a pacaibinsaan daytoy, kiddawenyo ti libreta Ti Naimbag a Damag Iti Pagarian). Masaracanton ti lubong ti agnanayon a cappia.

TI NAISANGSANGAYAN A MASACBAYAN

Ay-ayaban ti Dios ita ti sumagmamano laeng, no ar-arigen ti agsao, manipud cadagiti reprep [a tattao] nga agbalin a paset ti Iglesiana. Ibilangna ida cas umuna-a-bunga ti espiritual nga apitna (Santiago 1:18) – napilida, no agtalinaedda a napudno, a makipagturay ken Cristo iti Pagarianna, ngem saanna nga ayaban ti tunggal maysa itan (Roma 11:7-8, 25-26). “Awan ti macaumay Caniac no saan a guyugoyen ti Ama a nangibaon Caniac; ket pagungarecto inton maudi nga aldaw” (Juan 6:44). Idi insawang ni Jesus a pagungarennanto ti cucuana iti maudi nga aldaw, sasaoenna maipapan ti maicadua a yaayna. Idiaya ni Pablo dagitoy mainayon a pannacaibinsa: “Addanto maipuccaw a bilin; agtimecto ti pangulo dagiti angheles; aguninto ti trumpeta ti Dios, ket ti APO a Mismo bumabanto manipud langit. Umunanto nga agungar dagiti natay a nagtalinaed iti pammati ken Cristo. Calpsanna, datayo a sibibiag iti dayta a tiempo, maurnongtayto a maicuyog cadacuada iti ayan dagiti ul-ulep tapno sabtentayo ti Apo idiay tangatang. Iti casta, canayonton nga addatayo iti denna ti Apo. Aglilinniwanliwacayo ngarud babaen dagitoy a sao” (1 Tesalonica 4:16-18).

No maawatan ken aclonentayo ti plano ti Dios iti pannacaisalacan, masaracantayo ti dackel a liwliwa iti daytoy a kinapudno. Inton umay ni Jesus, dagitinto nagbabawi ken nangaclon Kencuana cas Mangisalacan cadacuada ken insucoda ti biagda iti naayat a panagtulnog macasaracdanto iti liwliwa. Awanton ti panagsagabada. Itdento cadacuada ti agnanayon a biag iti baro a bagi – espiritu a bagi – a saanton a macaammo iti panagsagaba (1 Corinto 15:35-54).

Addanto banag a maammoantayo a maawatantayo laeng bassit bayat ti panagbiagtayo iti lasag [cas tao], nga “iti sagabaentayo iti daytoy agdama a biag saan a maipada iti gloria a maiparangarangto cadatayo” (Roma 8:18).

Dagiti macaawat iti dackel a panggep ken panangayab ti Dios masaracanda pay laeng a ti biag sumagpaminsan nasaem (versiculo 23), ngem maawatanda no sapay. Padpadaananda ti tiempo inton ited ti Dios cadacuada iti agnanayon a biag ken pagbalinenna ida a makipagturay ken ni Cristo iti Pagarian ti Dios. Pakiredennatayo ni Pablo nga “aglilinniwanliwacayo ngarud babaen dagitoy a sao” (1 Tesalonica 4:18).

DAGITI NASAEM A LECSION

Napaliiw ni Pablo a dagiti Cristiano, cas ken Cristo, masapul nga agsagabada: “Ta naited cadacayo ti gundaway nga agserbi ken Cristo, saan laeng a babaen ti panamatiyo Kencuana, no di pay ket iti panagsagabayo gapu Kencuana” (Filipos 1:29).

Ipalagip ni Pedro cadagiti Cristiano a namnamaenda coma ti agsagaba gapu ta maaramat ti Dios ti panagsagaba a mangtulong iti pannacapalibnustayo iti panagbiddut. “Gapu ta nagsagaba ni Cristo iti bagi, sisasaganacayo coma nga agsagaba a cas Kencuana, agsipud ta ti siasinoman nga agsagaba iti bagi saanen nga agbasol” (1 Pedro 4:1-2).

Cas inlawlawag ni Cristo, manamnama dagiti pasurotna ti panagsagabada. Ngem ti Dios ipalubosna no dadduma ti panagsagaba gapu ta ti saem isuronatayo nga idiantayo ti basol uray pay cadagiti caricutan a casasaad.

No ipalubos ti Dios ti panagsagabatayo gapu cadagiti biddut a pilitayo, kinapudnona, tigtignayenna ti kinamanangngaasina. Sapay? Gapu ta iti pagbanagan ti panangitultuloy iti panagbasoltayo no ammotayo iti nasaysayaat (no ditay agbabawi) isu ti agnanayon a patay.

“Nayaw-awanac sacbay a dinusanac,” kinuna ti nagsurat iti Salmo 119, “Ngem ita, tungpalecon ti saom” (versiculo 67). Ipalagipna cadatayo a ti panagsagaba isut mangipalagip cadagiti pagbanagan ti basol, a ti panagsagaba macapataud cadagiti manayon a gin-awa a nalabit ditay mapanunot bayat ti panangasicasotayo iti pisical ken emosional nga ut-ottayo.

TI NASKEN A PANGGEP ITI UT-OT

Ni Dr. Brand nagtrabaho iti adu a tawen a nangag-agas cadagiti agcucutel idiay India ken America. Cabayatan ti panagtrabahona nacagteng iti nacascasdaaw a pangngeddeng maipapan iti patolohia ti cucutel.

Sagsagabaen dagiti agcucutel iti lunod a dagiti ramramay ti ima ken saca ken uray dagiti agong ken lapayagda – agrupsa ken agrunotda, ngem awan ti macaammo no sapay.

Sacbay ti panagsukimat ni Dr. Brand, impagarup dagiti mangngagas a nailunod dagiti agcucutel iti “dakes a lasag.” Ti naisangayan a nataccuatan ni Dr. Brand nagdas-al iti problema iti leprosy bacilli, a mangraut cadagiti ur-urat ti bagi, pagtignayenna ti pamay-an nga agturong iti pannacatay dagiti urat. No mapasamac daytoy, ti masakit a masugat uray bassit laeng – uray no gumriad laeng – saanna a maricna ti sakit ti nasugat a disso. Nagbanag nga itultuloyna nga usaren ti nadadael a paset ti bagi. Daytoy maulit-ulit a pannacausar pacaroenna ti sugat. Pagangayanna napalalonto unayen ti pannacadadael ti lasag ket matay, agrupsa ken matinnag.

Rinugian ni Dr. Brand nga inagasan dagiti sugat ti agcucutel iti panangsalacnibna cadacuada, no dadduma cementoenna (plaster cast) pay ida. Masansan nga umimbag dagiti sugat ket awanen ti mainayon a pannacadadaelda. Ti nasalacniban a lasag agbalin manen a nasayaat, numan pay saanen a macaricna ti nasecnan a paset ti bagi gapu ta agnanayon ti pannacadadael ti uratna.

Inkeddeng ni Dr. Brand a ti ut-ot maysa a sagut nga aggapu iti Dios a mangballaag cadatayo nga adda banag a nagbalin a dakes wenno nagbiddut. Ti pangngeddeng daytoy mangngagas maipaay met cadagiti dadduma a sacsakit, saan laeng a cucutel. No madangranantayo, pagtignayantayo coma a dagus dagiti pagilasinan ti bagi ket agpaagastayo tapno mabang-arantayo iti ut-ot ken pananacapucaw ti casisigud a nagtaudanna.

“Awan a pulos ti capanunotac no casano ti pannacaiwayang ti bagi no awan ti sistemat’ pammallaagna,” inggibus ni Dr. Brand (Brand and Yancey, p. 121).

DAGITI LECSION ESPIRITUAL A PATAUDEN ITI PANAGSAGABA

Macaalatayo iti mayannatop a pagarigan iti nataccuatan ni Dr. Brand. Adda dadduma a panagsagaba a bunga dagiti basbasol wenno kinamaagtayo. No dadduma ti pagbanaganna isu ti dagdagus a mangpatignay cadagiti nasaem a pataudenna iti bagitayo. No dadduma ipalubos ti Dios ti casta a pannacaalusais – ken panagsagaba – tapno icasotayo no ania ti ar-aramidentayo ket allucoyennatayo a mangbaliw iti ugali, cadawyan wenno pangngeddengtayo.

Caaduan a saem ti panunot ken bagi isut bunga ti panaglabsing cadagiti bilbilin ti Dios, ammotayo man wenno saan. Cas imbaga ti maysa a saycayatrista, “Gudua dagiti tattao nga adda sacsakiten ti bagida, nga agturong cadagiti pagpaagasan, iti napaypayso, cuncunada, ‘Masakit ti biagco.’” (ibid., p. 251).

No dadduma agbasoltayo ngem saantayo a masactan a dagus. Itden ti Dios iti panangicasotayo iti basol babaen ti panangipalubosna nga agsagabatayo iti nasaem a pannacasuot. “Agsipud ta babalawen ti Apo ti ayatenna, ket saplitenna ti amin nga awatenna a cas anac” (Hebreo 12: 6). Naglaon ti Nasantoan a Surat cadagiti adu a pagarigan dagiti lallaki ken babbai a dagiti bibiagda nangipasimudaag iti daytoy a principio.

Iti panangipalubosna iti macapasakit a mangiparangarang cadatayo cadagiti nagbiddutan ken gettang ti cababalintayo, ti Dios saan a naisupadi iti siasinoman a managayat a naganac. Dagiti amma ken inna a mangay-ayat cadagiti annacda igaeddat’ tiempo ken bannogda a mangisuro ken mangipatungpal cadagiti lecsion para iti pagsayaatanda. Casta met ti aramiden ti Dios gapu ta cayatnatayo a macasursuro (Hebreo 12:5-11).

No dadduma ipalubos ti Dios iti panagsagabatayo tapno masursurotayo iti nalinteg a maisupadi iti nakillo, tapno maammoantayo nga agpannuraytayo Kencuana ken ti pannursurona. Saantay coma ngarud a masdaawan no ti biag, uray para iti Cristiano, iramanna dagiti dagensen ken pannuot (1 Pedro 4:12-13).

Cadagiti sabali a casasaad mabalin a dumteng ti panagsagaba saan a bunga ti mismo a basol, no di ket makita ti Dios a masapul a gugoran ken papigsaen iti maysa a paset ti cababalintayo. Cas iti panagcapsut ti lasag no saan a maaramat, casta met ti panagcapsut ti pammati ken cababalin no saan a rumbeng ti pannacawatwatda.

Insurat ni Pedro iti pateg dagiti pannuot idi inlawlawagna: “Agrag-ocayo iti daytoy, nupay masapul nga aglidaycayo ita iti apagbiit gapu cadagiti nadumaduma a sagabaenyo. Nairanta dagitoy a pangpanecnec iti kinapudno ti pammatiyo. Uray pay ti balitoc a madadael, magugoran iti apuy; ket ti pammatiyo a napatpateg ngem balitoc, masapul met a masuot tapno macaibtur. Iti casta, awatenyonto ti pannacaidayaw, dayag ken tan-oc inton maiparangarang ni Jesu Cristo” (1 Pedro 1:6-7).

SURSUROEN TI AGPANNURAY ITI DIOS

Ammoentayo coma a nupay ta ipalubos ti Dios dagiti pannacasuottayo, saan a dinatay asicasoen no dumtengda. Ti Dios maysa nga Ama. Ad-adda pay ngem ti agay-ayat a nataoan nga ama, awan ti rag-ona a macakita nga agsagaba iti saem dagiti annacna. Casano ti panagricnana cadatayo cadagita casta a tiempo? “Itaclinyo Kencuana dagiti amin a pacaringgoranyo agsipud ta ipatpategnacayo” (1 Pedro 5:7). Dagitoy a sasao ipacaammoda cadatayo a no dadduma masapul nga agpannuraytayo a nameclan iti Dios para iti pigsatayo nga agibtur.

No madangranantayo, cayatna nga umasidegtayo Kencuana. Icarcarina a tulongannatayo no aramidentay iti casta. Insurat ni Pablo a liwliwaen ti Dios dagiti malmalday (2 Corinto 7:6), ngem masapul a dawatentayo Kencuana iti casta a tulong. Icarcarina a dina ipalubos iti pannacasuottayo iti nalablabes ngem ti maandurantayo ket iccannatayo iti pannacabang-ar wenno iti pigsa a masapultayo nga agibtur (1 Corinto 10:13). Masapul a pagtalcantayo ti Sao ti Dios ket umasidegtayo Kencuana para iti daytoy a cari, nangruna no maricnatayo nga awan a pulosen iti gawaytayo.

Masapul nga ammoentayo a masansan a salacniban ti Dios dagiti cumamang Kencuana. “Ti APO ti mangidalan iti tao iti rumbeng a pagnaanna, ket salacnibanna dagiti macaay-ayo Kencuana. Uray no maitibcol, dinto matuang, ta tengtenglen ti APO ti imana” (Salmo 37:23-24).

Basaenyo ti entero a Salmo 91 nga adda daytoy iti panunotyo. Kiddawentayo coma iti Dios a salacnibannatayo ken dagiti ingungotentayo. Ipangagna dagiti cararag dagiti nalinteg (Santiago 5:16; 1 Pedro 3:12), ken talaga a salacnibanna ken bendisionanna dagiti tattaona. Nupay casta, awan iti mailacsid cadagiti pagayatan ti tiempo ken mairanrana a bambanag. No dakes ti isasamay dagita cadatayo, dawatentayo coma Kencuana a salluadannatayo iti panagsagaba a nalablabes ngem iti cabaelantayo nga ibturan ken iccannatayo iti bileg a masapul iti panagibturtayo.

TI DIOS AGTALINAED A MANGTENGTENGNGEL

Ipakita dagiti panagadal a ti bael ti tao nga agibtur iti ut-ot matulongan babaen ti panangtengngel. Masapul nga aramidentayo amin a cabaelantayo a mangep-ep, manarawidwid ken mangtengngel iti panagsagabatayo. Ket maammoantayonto a saantayo nga adipen ti pagayatan ti ut-o, ket mapilitayo ti agtalinaed a mangtengngel cadagiti cababalintayo ken ti pannignaytayo iti ut-o.

Cas tagabunatayo ti Dios masapul a sursuroentayo nga iti camaudianan ti Dios ti agtengtengel, ken mangngaasi. Siaayat ken sibabael a mangisalacan cadatayo. Silulucat dagiti lapayagna a dumngeg cadagiti cararagtayo (1 Pedro 3:12).

Ngem inanamaenna nga agsadagtayo iti pangngeddengna ken panniempona ket sitatali-pupos ti panagtalectayo Kencuana.

BIAG A SIWAYAWAYA ITI UT-OT?

Cabayatanna, nalabit matiliwtayo iti sirib ti sao ni Santiago: “Cacabsatco, ibilangyo a ragsac no aglac-amcayo iti amin a kita ti rigat agasipud ta ammoyo a ti pannacasuot ti pammatiyo, pataudenna ti anusyo nga agibtur. Tapno naan-anaycayo ket awan pacapilawan ken pagcuranganyo, masapul nga agtalinaedcayo iti kinaanusyo nga agibtur (Santiago 1:2-4).

Dagiti sasao ni Santiago casla saan a napaypayso cadagiti agnanaed iti Makinlaud a lubong agsipud ta adu dagiti agbibiag iti panagar-arapaap a cabaelanda a pucawen iti ut-ot. Nagtaeng ni Santiago iti gimong a cancanayon dagiti tattao a mangsarsaranget iti panagsagaba. Ad-adda a nairuamdan cadagiti pagimbagan nga ited ti panagsagaba ngem datayo.

Ti biag a nawayawayaan iti ut-o saan a mabalin. Masapul a sangoentayo ti kinapudno a masursuroannatayo ti Dios cadagiti napateg a lecsion babaen ti panagsagaba. Saan a cayat a saoen daytoy a ti panagsagaba macaay-ayo. Uray pay no ibilangtayo ti pannacaadda a nasapsapa iti ut-ut ket macasagana ti nakemtayo para iti dayta, no dumtengen mapadasantayo iti naranggas a panagriing. Ti ut-ot dalapusenna ti biagtayo iti macabagsol a kinaagpayso. Isu ti di-cayat, macarimon a cabusor wenno casla casta.

Ngem dagiti panagsagaba ken pannacasuot mabalin a macatulongda, iti espiritual a panagricna, iti pannacaisaganatayo para iti panggep ti Dios ken iti Pagarianna. No dadduma ti pannakipaymaymaysatayo iti panagsagaba ad-adda a mapagteng calpasan ti kinaagpaysona – calpasan nga inibturantayon ken naawatantayon ti espiritual a kinatangken a partuatenna cadatayo.

Ti laeng cangatoan a pacaisalacanan iti ut-ot ken kinaricut aggapu iti Dios, iti panagcararag ken panagtalec Kencuana. Apaman a sacbay ti panagsagaba ni Jesus iti rigat ti pannacailansana iti crus, nagcararag: “Ama, no mabalin, ilisinac iti daytoy a copa ti panagsagaba. Nupay casta, saan a ti pagayatac ti maaramid no di ket ti pagayatam” (Mateo 26:39).

Ipalagip ni Pedro a laglagipentayo dagiti pagimbagan iti panangsango cadagiti cabusortayo: “Ti Dios ti amin a parabur a nangayab cadacayo a makiranud iti agnanayon a dayagna babaen ti pannakipagmaymaysayo ken Cristo, patibkeren, papigsaen ken ipasdecnacayto iti nalagda a fondasion” (1 Pedro 5:10).

IPAMAYSA NGA ITURONG TI PAMINGMINGATAYO ITI MASACBAYAN

No maammoantayo dagiti pagimbagan a cacuycuyog ti panagsagabatayo, nasaysayaat ti panagibturtayo. Ni Victor Frankl, maysa a saycoterapista a nacalasat iti campot’pagpatayan idiay Auschwitz idi Maicadua a Gubat Sangalubongan, natacuatanna ti kinapangruna ti panangbiroc iti caipapanan ti biag, nangruna iti cadacsan a casasaad. Napaliiwna a dagiti balud a macaipamaysa iti pamingminganda iti calat ad-adu ti gundawayda a macalasat.

Nupay ta masaracantayo a naricut a panangtengngel cadagiti espiritual a pagimbagan ti panagsagaba, iti camaudianan cabaelantayonto a maawatan ida nga entero inton maawattayo ti agnanayon a biag iti Pagarian ti Dios (2 Pedro 1:11).

Iti daydiay a Pagarian dinto matucod ti kinawadwad ti magun-odtayo ngem ti napucawtayo babaen ti panagsagabatayo ditoy a biag. Cas ipalawag ni Pablo, “Ibilangco a ti sagabaentayo iti daytoy agdama a biag saan a maipada iti gloria a maiparangarangto cadatayo” (Roma 8:18). Ipalagipna cadatayo a “makipagtrabaho ti Dios iti pagimbagan dagiti agayat Kencuana, cadagiti inayabanna cas mayannurot iti panggepna” (versiculo 28). Pinaltiingan ti Dios ni Pablo nga isuratna daytoy; ket masapul a patientayo!

Macatulong ti panagsagaba iti panangtungpaltayo iti panagbalintayo cas annac ti Dios (1 Juan 3:1). Babaen ti tulong ti Dios, mapataud dayta iti imbag. Maysa a mannaniw ti nangidaniw iti castoy:

“Saggaysacayo a naiccan iti sangasupot a casangcapan,
Maysa nga awan-itsurana a bato ken librot’ pagannurotan;
Tunggal maysa mangaramid sacbay a tumayab ti biag,
Iti pacaitibcolan a bato wenno bato a pagbatayan.”

Dayta pagbatayan-a-bato isut’ dalan nga agturong iti Pagarian ti Dios.

PANAGSAGANA PARA ITI PANAGTAWID

Ibaga ni Pablo cadatayo a, ti mainayon iti panagbalintayo nga annac ti Dios, datayo dagiti “paratawid ti Dios ken makipagtawid ken Cristo” (Roma 8:16-17). No agtawidtayo, adda ngarud tawidentayo. Ti Biblia ipalgacna ti tawidentayo saan a ti masacbayan nga awan ar-aramidentayo ken panagpallailangtayo no di ket maysa a naindaclan a pagrebbengan.

Ti Nasantoan a Surat ipalgacna a, ti agpayso, tawidentayo ti sanicua ken negosyo ti Amatayo. Tarigagayanna nga iccannatayo iti tiempo a dumackel. Cayatna nga isuronatayo no ania ti tulong a masapultayo iti panangidur-as iti cababalin a casapulantayo.

Awan ti pagnaan nga asideg iti daytoy a pamay-an. Saan nga umanay ti pannacaammo. Saan a mapadackel iti cababalin iti agpatnag; masapul iti tiempo ken adu a bannog. Isut gapuna nga ibaga ni Pablo cadatayo: “Agsipud ta annacnatayo, tawidentayto dagiti iduldulinna a bendision nga agpaay cadagiti tattaona. Makipagtawidtayo met ken Cristo cadagiti indulin ti Dios nga agpaay Kencuana. Ta no makipagsagabatayo ken Cristo, mairamantayto met iti gloriana” (versiculo 17). Uray cas iti panagsursuro ni Cristo ket napaan-anay babaen cadagiti bambanag a sinagabana (Hebreo 5:8-9), casta met a sursuroentayo ket agbalintayo a naan-anay babaen cadagiti rigrigattayo, ket agtungpal iti pannakipagtawidtayo Kencuana iti Pagarian ti Dios.

Ti nacascasdaaw a cari iti daytoy pakiramanan a tawid – cas annac ti Dios iti agnanayon a familiana – macatulong a mangilawlawag no sapay a masapul nga agsagabatayo. No ti masacbayantayo basta agil-iladtayto lattan ken agpalpallailang sadi langit ken mingmingmingantayto lattan ti rupa ti Dios iti kina-agnanayon, mabalin nga alaennatayo itan wenno ibatinatayo ditoy ket salacnibannatayo iti aniaman a rigat ken ut-ot. Iti casta nga akem awan ti casapulan nga aramiden a pasettayo.

Ngem ti masacbayantayo am-amang a dacdackel ngem iti dayta. No dacdackel ti pagrebbengan nga indulinna para cadatayo, dacdackelto met dagiti carit iti pannacadanontayo sadiay.

INTON CAANO TI PANAGSARDENG TI PANAGSAGABA?

Iti napalabas a capitulo nakitatayo nga adda panggep ti Dios a lumabes iti daytoy a biag. Ti naindaclan a panggepna ibilangna ti panagsagaba ti tunggal tao nga agtignay iti ayabna. Nupay casta, caaduan a cameng ti nataoan a puli saanda nga agtignay wenno dida mapuotan daytoy naisangsangayan a panggep. Casta ngarud iti daytoy “agdama a dakes a panawen” (Galacia 1:4) palpalubosan ti Dios a macasursuro iti nasken a lecsion dagiti nataoan a parsua.

Pagayatanna ti pannacaammo ti sangcataoan a ti basol pataudenna ti nacaal-alingget a pagbanagan ket, nanipud pay idiay Hardin ti Eden, indas-altayon ti adu a ladingit iti bagitayo babaen ti panangiwacsitayo cadagiti pannursurona. Nupay ta nayindayon, babaen ti rinuker ken dakes a panangallucoy ni Satanas, dagiti nataoan a parsua masapul nga ibaclayda ti entero a pagrebbengan para cadagiti pagbanagan dagiti ar-aramidda. Mabalin coma a daytoy lubong isut ayan ti cappia, kinatalged ken kinaragsac no la coma pinili ti tao a surotenna dagiti wagwagas ti Dios imbes a ni Satanas.

Naganetget ti Dios a masursurotayo dayta a lecsion, numan pay nasaem. Inlanad ti Biblia nga iti adu a pasamac ginay-atna [ti Dios] a telleden dagiti tattao ti panangitultuloyda cadagiti dakes nga aramidda. Ngem ti macatalipungaw a caaduan inulit-ulitda nga inwacsi dagiti bilbi-linna, cas cada Adan ken Eva idiay hardin ti Eden.

TI PANNIGNAY TI TAO A MAIBUSOR CADAGITI BABAONEN TI DIOS

Cas pangarigan, calpasan ti panangisalacan ti Dios cadagiti Israelita iti pannacaadipenda cadagiti Egiptiano, nakitulag dagiti Israelita iti Dios a salimetmetanda dagiti bilbilinna. Ngem saanda a tinungpal ti catulaganda.

Calpasanna, nangibaon ti Dios iti adu a profeta, ket dagiti mensaheda naidulin para cadatayo iti Biblia, a mangballaag cadacuada ken mangdagdag iti panagbabawida. “Ngem rinabrabacda dagiti imbaon ti Dios, dida incascaso dagiti saona ken kinatcatawaanda dagiti profetana. Nagangayanna, casta unay ti pungtot ti APO cadagiti tattaona, ket awanen ti macalisi” (2 Cronicas 36:16).

Imbes ta mangipangagda, indadanes ken pinapatayda dagiti babaonen ti Dios. Babaen ken ni Isaias insawang ti Dios no casano ti panangulit-ulitda a nagmadian iti indiayana a tulongna cadacuada. “Sisasaganaac nga umawat cadagitoy a tattao, isuda a mangipapilit nga agaramid iti dakes ket mapanda iti caycayatda” (Isaias 65:2).

Gapu ta saanda a nangipangag sinentenciaan ti Dios ida iti nailian a pannacadusa. Pinarmec ti Emperio Asiriano ti Israel ket intalawna a binalud dagiti tattao idi maica-8 a siglo S.C. [Sacbay ni Cristo](2 Ar-ari 17:5-8). Ti pagarian ti Juda pinarmec ni Nebucadnesar ti Babilonia ket impanawna nga incarsia idi nasursuroc bassit ngem maysa a siglo iti naglabas (2 Cronicas 36:15-20).

Adda paset ti nasion ti Juda a nagsubli iti sigud a dagada ket addada sadiay idi nangasaba ni Jesus cadagiti caputotan ni Juda agangay a lima-a-siglo calpasan ti panagsublida. Idi nangngegda ti mensahe ni Jesus iti panangibilinna iti panagbabawi ken panagtulnogda, ania ti pannignayda? Caaduan ti nangiwacsi Kencuana cas met la ti namay-anda cadagidi nasapsapa a profeta. Sada pinapatay [ni Jesus]!

Adda dagiti paspasamac a nangibaon ti Dios cadagiti profeta a mangballaag cadagiti gentil a nasion. Iti entero a pacasaritaan [ti lubong] mabasatayo iti maysa a pagarigan iti saan-nga-Israelita a tattao nga isuda amin ti nagbabawi cadagiti basbasolda calpasan ti pammallaag ti Dios. Nangasaba ni profeta Jonas idiay ugma a siudad ti Nineve ket imbagana cadagiti agnanaed sadiay. “Uppat a pulo nga aldaw manipud ita, madadaelto ti Nineve!” (Jonas 3:4). Ti ari ken dagiti iturayanna nagbabawida cadagiti basbasolda, ket inispal ti Dios ida (versiculo 5-10). Ngem di nagbayag, nagsublida iti kinadakesda. Cas banagna rimmaut ken pinarmec ida dagiti armada idi 612 S.C.

Ti pacasaritaan [ti lubong] ipakitana, nga uray no sibubuslon nga indiaya ti Dios ti tulong ken pangiwanwanna cadagiti nasion, gagangay ti panangiwacsida, cas iti inaramid da Adan ken Eva.

PAREHO A DATI A CABABALIN

Saantayo a naigiddiat cadagitoy nga aldaw. Pagmadmadian pay laeng ti sangcataoan dagiti pannursuro ti Dios. Ti saona – iti Biblia – nasagana latta a maala ti caaduan a paset ti lubong. Nupay casta, manmano laeng ti canayon a mangbasa, ken basbassit pay ti agtulnog. Saanda laeng a sumukir cadagiti pannursurona, no di ket umad-adu, nangruna dagiti mangibagbaga a nasariritda, ti marurod iti Biblia. Uray dagiti dadduma a pangpangulo ti relihion saot’bibig ti panangisawsawangda iti Biblia ngem suppiatenda ti napangruna a paspasetna. Piduten ken pilienda dagiti paspaset a cayatda a tungpalen ken dagiti pagayatan ti ricnada a baybay-an.

Apag-isu iti pananggupgop ni Solomon iti nataoan a casasaad idi insuratna: “Dimo malinteg ti killo; ...” (Eclesiastes 1:15). Iti entero a pacasaritaan [ti lubong] inidiaan ti sangcataoan ti pannursuro ti Dios ket itultuloyna nga aramiden dayta. Iti panangiwacsitayo iti impalgac ti Dios, inabbengantayo ti bagbagitayo iti cacaisuna a napaut a pangiwacnit cadagiti parparicuttayo.

Ti banagna isu ti panagtultuloy ti ut-ot ken ladingit dagiti nasion. Cas bungana, ti aramid ti Dios manipud idi umuna a siglo aginggat’ ita isu ti panangayabna iti sumagmamano a tattao ditoy ken idiay a rummuarda iti “daytoy agdama a dakes a panawen” (Galacia 1:4) ket agbalinda a matalec a babaonenna. Ti caaduan iti sangcataoan agcadcadappada iti casipngetan. Agbirocda iti pannacaawat ken caipapanan ti biag ngem agtalinaedda a nengneng cadagiti rason a nadidigratayo iti adu a panagsagaba. “...Cancanayon nga agsursuro ngem pulos a dida maammoan ti pudno” (2 Timoteo 3:7).

Inallilaw ti diablo ken binalud ti basol, iti entero a sangcataoan nalappedan iti nadiosan a pannacaawat ket isu ti dupdupdopen ti gura ken pungtot ni Satanas (Efeso 2:3)

Ti sangcataoan cancanayon a pabasolenna ti Dios gapu cadagiti kinadakes ken panagsagaba ditoy lubong ngem saan a ti Dios ti mapabasol. Ti pagrebbengan maidas-al cadatayo gapu iti pangngeddengtayo a nangiwacsi iti panangiwanwanna [ti Dios] ket pinilitayo ti biag a managbasol – ken ni Satanas gapu ti panangallilawna iti sangcataoan.

CAANO TI PANAGGIBUSNA?

Iti naimbag a damag saan a binaybay-an ti Dios ti sangcataoan. Cas iti panangipalubosna cada Adan ken Eva iti wayawaya nga agpili, casta met a palubosanna dagiti nasion ken dagiti umili a mapan iti bucodda-a-dalan. Ipalubosna ti panagsagaba ti lubong ta pangisurona cadatayo, a ditay masaracan ti napaut a cappia, kinatalged ken pannacapnec no awantayo Kencuana.

Agad-adaltayo iti narigat a lecsion a ditay maiturayan a husto ti bagbagitayo no mailacsid ti Dios ken dagiti lintegna. Ti pagbanaganto dagiti aramidtayo isu nga, apaman a sacbay ti isusubli ni Jesus ditoy daga, agngangabitto ti sangcataoan iti ngarab ti pannacaungaw. “Ta no saan a mapaababa ti tiempo ti riribuc, awan a pulos ti macalasat” (Mateo 24:22).

Daytoy ti pammallaag ni Jesus nganngani 2,000 a tawenen ti naglabas. Nabiit pay laeng a tiempo iti iseserrectayo iti panawen nga addaantayon iti pannacabalin a mangdadael iti lubong. Dagiti pangpangulo ti gobierno, seyencia ken relihion mamatida a ti laeng wagas [dalan] a malisiantayo ti pannacadadael isu iti panangipasdec iti sistemat’ sangalubongan a panagtitinnulong.

Ni Michio Kaku, seyentista, mannurat ken manarawidwid iti programat’ telebision, insuratna a “ti basta bileg ti...panagbalbaliw seyentifico ti mangpilit cadagiti nasion ti daga nga agtitinnulong iti tucad a dipay pulos nakita idi iti entero a pacasaritaan ti lubong.” Innayonna: “Iti licudan adda latta nga agalla-alla ti pannacabalin nga adda gubat nuclear, ti panagbettac ti macapapatay nga angol, wenno pannacarba ti aglawlaw [environment]” (Visions: How Science Will Revolutionize The 21st Century, 1998, p. 19).

Impadto ni Cristo a dagiti nasion, saan a nacascasdaaw, agkibaltang ti gagemda nga agtitinnulong a sicacappia. Imballaagna a di-agsarday ti panaggugubat, no di ket umad-adu (Mateo 24:6-8). Saan nga agpucaw ti panagsagaba; cumarcaro ketdi pay (versiculo 21-22).

Palpalubosan ti Dios dagiti tattao a manggay-at iti panangiturayda ti bagbagida uray no agcadcadappada iti espiritual a casipngetan. Ngem gapu ta inwacsida dagiti bilbilinna saanda nga agballigi. Ipakitanto ti Dios cadagiti amin a tao a dida maragpat ti sangalubongan a cappia ken agpatingga ti panagrigat ken panagsagaba no awan ti ibaballaetna.

Cas isut’ sibibiag ken nalinteg a Dios, ti Namarsua cadatayo saanna nga ipalubos ti dakes ken killo a lubong nga agtultuloy nga awan inggana. Saanna nga ipalubos ti panangungawtayo iti bagbagitayo. Ibaonna ni Jesus ditoy daga, ket iti dayta a tiempo agturayto a cas Ari dagiti ar-ari (Paltiing 19:16). Bumallaetto ti Mesias iti cangitingitan ti panagrigat ti tao (Daniel 12:1).

Iti samayna, racraken ti Dios ti isuamin ket mangruginto manen. Apaman a maipapasen ti sangalubongan iti panagdadael nga insalaysay ti Paltiing 6-19 ken dadduma pay a biblical a padpadto, bumallaeten ni Cristo ket ipasdecnanton ti pagarian ti kinalinteg ket rugiannanton a palintegen ti kinakillo ti husticia ken kinaawan-simbeng ditoy lubong.

ITI CAMAUDIANAN CASANOT’ PANNACASARACTO ITI CAPPIA DAGITI AGSAGSAGABA

Ti plano ti Dios iramanna ti wagas ti pannacasubbotto amin dagiti nagsagaba ken natay idi naglabas a tiempo a dida naawatan no sapay a nagsagabada. Riniwriwriw dagiti lallaki, babbai ken ubbing a nagbiag ken natay iti entero a pacasaritaan ti lubong a dida naammoan ti Dios wenno ti panggepna. Ti caaduan cadagitoy dida pulos nangnangngeg maipapan ken Jesus iti unos ti panagbiagda. Nagbiag ken natayda a dida ammo no sapay nga immay ken awan a pulos ti pannacaawatda iti plano ti Dios.

Ipalgac ti Biblia a 1,000 a tawen calpasan ti panagsubli ni Jesus, pagungarento ti Dios amin dagiti nagbiag idi ngem bassit wenno awan ti pannacaawatda iti panggep ti Dios. Pagungarenna ida iti mabiit a pisical a biag ket iccanna ida ti camaudian a gundaway a mangaramat iti siwayawaya a pagayatan – ngem iti daytoy a daras addaandanton iti pannacaawat iti pudno nga espiritual a pannacaammo iti lubong nga iti wagas ti Dios, saan a ni Satanas, ti mangguyugoy.

Iti daytanto a tiempo agpilidanto wenno siaammodanto nga iwacsi iti wagas ti biag ti Dios. Ti pilida isunto ti mangikeddeng no macaawatda iti agnanayon a biag wenno mapucawdanto iti dan-aw nga apuy (Paltiing 20:15).

Daytoyto iti damo a gundawayda a maisalacan, gapu ta naisinada idi iti Dios babaen ti panangallilaw ti diablo (2 Corinto 4:3-4; 1 Juan 5:19; Paltiing 12:9).

Iti panagcullaap ni Satanas cadacuada dida pulos naawatan ti panggep ti Dios. Inton pagungaren ti Dios ida iti lubong a ti kinapudno siwayawaya a maala (Jeremias 31:34; Isaias 11:9), malagipdanto ti nacaro a panagsagaba a pinataud ti basol iti unos ti entero a pacasaritaan ti lubong ket macapagpilida manen, iti daytoy a daras addaandanton iti entero a pannacaawat iti pagbanagan ti basol ken ti panagsagaba nga itugotna. Caaduan ti mangaramid iti nalinteg a panagpili ken mangaclon ken ni Cristo cas Mangisalacan cadacuada – ti dalan, a no isut’ pilienda, isut mangiturong cadacuada iti agnanayon a biag.

Isalaysay ti Paltiing 20:12 daytoy a panagungar: “Nakitac dagiti natay, natan-oc ken nanumo, nga agtactacder iti sangoanan ti trono. Naluctan dagiti libro. Naluctan pay ti sabali a libro, ti libro ti biag. Naucom dagiti natay segun ti inaramidda a cas naisurat cadagiti libro” (Paltiing 20:12).

Pagungarento ti Dios dagitoy a tattao, sadanto maucom babaen cadagiti biblical a pagrucodan a mayannurot iti pannignayda iti espiritual a pannacalawag a naawatda a damo iti daytoy a tiempo. (Para iti ad-adu a pannacaibinsa maipapan cadagiti panagungar a naisalaysay iti Biblia, dawatenyo dagiti libre a libreta, Aniat’ Mapasamac Calpasan Ti Ipapatay? ken Ti Plano ti Dios Iti Nasantoan Nga Aldaw: Ti Naicari a Namnama Para Iti Amin a Sangcataoan).

Daytoy agdama a dakes a lubong saan a basta castoy ken pulos a saan a mabalin a basta castoyna lattan. Cas nakitatayon, daytoy ti lubong ni Satanas, saan nga iti Dios. Ngem ti Dios naan-anay a nalinteg, manangngaasi ken nasimbeng. Ti planona macaited iti nabalbaliwan a lubong, iti wagas a masubbot amin a sangcataoan ken inton amin ket naisaon ken naaramiden, amin a panagsagaba mapunasdanton.

Insalaysay ti Paltiing 21:3-4 iti tiempo inton awanen ti panagsagaba: “Nacangngegac iti napigsa a timec a naggapu iti trono. Cunana: ‘Agnaeden ti Dios cadagiti tattao! Makipagtaengto cadacuada ket isudanto ti ilina. Caduadanto ti Dios, ket isunto ti Diosda.’ Punasennanto dagiti amin a luada. Awanton ti patay, ladingit, sangsangit wenno ut-ot agsipud ta limmabasen dagiti immun-una a banag.” Anian a macapakired a sasao!

ANIA COMA ITI ARAMIDENTAYO?

Adu a tattao ti mangig-iggem iti biddut a capanunotan a nalatac cadagidi aldaw ni Jesus. Iti daydi a tiempo gagangay nga impagarup dagiti tattao nga iti salun-at ken kinabacnang ti maysa a tao isudat’ mangipakita iti kinalintegna wenno iti basolna. Dagiti addaan iti nagin-awa, nawadwad a biag naipagarup a benindisionan ida ti Dios idinto ta dagiti agsagsagaba iti kinapanglaw, sakit wenno rigrigat naipagarup a nadiosan ti pannacailunodda gapu cadagiti basbasolda.

Nagpalawag ni Jesus maipapan iti daytoy a capanunotan idi imbaga dagiti tattao iti maysa nga acsidente a nagalinggagetan dagiti umili ti Jerusalem. Babaen ti bilin ti Romano a gobernador, adu a lallaki ti nacarangranggas ti pannacapapatayda idi madama ti panagidatagda cadagiti datun iti templo.

Sinaludsod ni Jesus: “Ipagarupyo cadi a dacdackel ti basol dagitoy ngem dagiti dadduma a taga-Galilea, gapu iti casta a pannacapapatayda? Saan! Ibagac cadacayo a no saancayo nga agbabawi cadagiti basbasolyo, mataycayto amin a cas cadacuada” (Lucas 13:2-3).

Saan a maawatan dagiti nacangngeg cadagiti sasao ni Jesus a ti casta a didigra agdas-al cadagiti tattao nga agar-aramid iti naimbag. Dida pulos mairugi a maawatan no casano ti panangipalubos ti Dios iti casta a didigra.

Imbaga ni Jesus nga awan iti mailacsid cadagiti panagkillo-killo dagiti bambanag ti biag. Ti maadal? Malacsid no agbabawitayo mapucawtayo.

Sinarurongan ni Jesus daytoy nga adal iti sabali a pagarigan. “Ket ania met ti panangipagarupyo cadagidi sangapulo ket walo a natay a nagaburan idi marba ti torre idiay Siloe? Ipagarupyo cadi a dacdakes dagitoy ngem dagiti amin a tao nga agnaed idi idiay Jerusalem? Saan! Ibagac cadacayo a no saancayo nga agbabawi cadagiti basbasolyo, mataycayto amin a cas cadacuada” (versiculo 4-5).

Ti ipapatay iti saan a tiempo, cas iti pannacapapatay dagiti taga-Galilea a mangip-ipan cadagiti idatunda, basta napasamac idi addada iti biddut a lugar iti biddut a tiempo – basta nairanrana. Dagiti bictima iti dayta a didigra saanda a nacarcaro a managbasol ngem dagiti dadduma a lallaki ken babbai; isudat nairanrana a bictima dagiti naiparparna a paspasamac. Nupay casta, managbasolda, ket, cas cadagiti amin nga agbasol, naitudingda a matay.

Casta met ti kinapudno para cadatayo. Mabalin a saantayo a bictima ti naiparparna a kinarungsot wenno matupacan iti marmarba a patacder, ngem managbasoltayo, ket addanto latta maaramid cadatayo. No maammoantayo dayta, ti pammallaag ni Jesus salputenna coma ti consenciatayo: “Malacsid no agbabawicayo amincayo mapucawcayonto met.”

Ti pannacaammo nga agbibiagtayo iti lubong a napno iti rigat, a ti didigra mabalin a mapagteng iti aniaman a tiempo, ditay coma cadi ipangag ti pammallaag ni Cristo nga agbabawitayo ket rugiantayo nga ibatog ti biagtayo iti biagna? Cas imbaga ni Jesus iti tao nga inagasanna iti nabayagen a sakitna: “Dica agbasolen, amangan no addanto dacdakes a mapasamac kenca” (Juan 5:14).

Namnamaen ni Cristo ti panagbabawitayo ken panagturongtayo iti Dios. Ti Dios “itan bilinenna ti amin a tao nga agbabawida iti kinadakesda” (Aramid 17:30). Ti pannacaammo a ti tiempotayo ditoy daga ket ababa, nasaysayaat no natalged ti panangipamaysatayo iti panagaramid cadagiti bambanag a nasken Kencuana. (Tapno maawatanyo no aniat’ caipapanan ti panagbabawi, kiddawenyo ti libre a libretami Panangbalbaliw Iti Biagyo: Ti Pamay-an Iti Panagbalbaliw).

NO AGSAGABACAYO

No agsagsagabacayo, ania coma ti aramidenyo? Iyumanyo ti paricutyo iti Dios ket kiddawenyo ti pangpagin-awana ken pammakiredna! Iti libro dagiti Salmo mabasatayo ni Ari David a dawdawatenna iti namin-adu a daras nga iccaten ti Namarsua ti panagsagabana.

Immay ni Jesus ditoy daga a mangpalag-an ti panagsagabatayo. Saan a ganggannaet ni Jesus iti panagsagaba ti sangcataoan. Idiayana iti liwliwa, tulong ken namnama cadagiti agsagsagaba.

“Umaycayo Caniac, dacayo amin a nabannog nga agtartrabaho ken agaw-awit iti nadagsen, ket paginanaencayo. Alaenyo ti sangolco, ket agsursurocayo Caniac agsipud ta naemma ken napacumbabaac, ket masaracanyonto ti inana” (Mateo 11:28-29).

Saan a masapul a maupaytayo iti dakes a nagsacnap ditoy lubong. Ti pannacaammo a dumteng ti panagsagaba para cadagiti rumbeng a rason macatulong cadatayo a mangsungbat iti saludsod no sapay nga ipalubos ti Dios ti panagsagaba. Ti Dios isut agturay ken cangatoan a manarawidwid. Incarnina nga isalacanna ti lubong iti panagsagaba – saan nga itan, no di ket inton agsubli ni Cristo a mangipasdec iti Pagarian ti Dios. Ibagana ti panagcararagtayo iti idadateng dayta a Pagarian ken urayentayo a siaanus dayta a tiempo (Mateo 6:9-10; Lucas 21:19). Isunto laeng ti panagpatingga ti panagsagaba.

No para iti bucod-a-biagyo, ipatalgedyo iti panangisucoyo iti bagiyo iti Dios a sipupudno ti panagbabawiyo, cas imbilin ni Jesus (Lucas 13:3, 5). Idi immay ni Jesu Cristo ditoy daga cas Anac ti Dios 2,000 a tawen ti napalabasen, naammoanna a sinangpetanna dagiti tattao nga agas-asug iti kinadagsen ti kina-awan-husticia ken nacaro nga ut-ot. Iti dayta a lubong kinunana, “Dagiti tattao nga agnaed iti casipngetan nakitada ti naraniag a silaw! Ket cadagiti agnaed iti nasipnget a daga ni patay nagraniag ti lawag!” (Mateo 4:16). Ti lawag a sinao ni Jesus Mismo ti Bagina ken ti kinapudno ti Dios nga impalgacna.

Imbaga ni Jesus cadagiti tattao a ti pagannunganda isu ti panagturongda iti Dios: “Agbabawicayo cadagiti basbasolyo, agsipud ta asidegen ti Pagarian ti langit” (versiculo 17). Daytoy, iti ngatoen ti isuamin, isut masapul nga aramidentayo. Ditay maliclican ti panagsagaba ditoy lubong a napno iti kinadakes, ngem no agturongtayo iti Dios mapadasantayo iti liwliwa ken namnama iti panangkitatayo iti masacbayan a lubong a nawayawayaan iti panagsagaba.

SANGOANAN A TUGAW [TI PAGBUYAAN] ITI PANAGSAGABA

Ti tecnolohia nangidiaya cadatayo iti sagut a pagduaduaan ti pategna – ti pAnnacabael a mangkita cadagiti tattao nga agsagsagaba a sibibiag iti telebision babaen cadagiti maiwarwarnac a damdamag nga aggapu iti nganngani amin a lugar ditoy planeta.

Makitatayo dagiti tattao nga agsagsagaba iti ut-ot iti mismo a cacaarruba iti aglawlawtayo, ngem adda pagtugawantayo iti sangoanan a pagbuyaan cadagiti reprep nga agrigrigat iti isuamin a paset ti lubong. Ti casla agballa-a-lubong dagiti agiwarwarnac iti daytoy a kita ti panagipadamag adda latta ken no dadduma nganngani saan a maliclican.

Babaen ti agalla-alla a mata ti cabaroanan a comyunicasyon [panagpinnallatipat ti panagsasao ken panagdidinnamag], maimatangantayo ti kinaranggas ti sangcataoan iti nabibiag a marisna. Naidatag iti sangoanantayo iti mismo nga uneg ti taengtayo ti kinaalingget ti gubat. Mabuyatayo ti kinadakes dagiti tiritir [ti panunotda a tattao] a maar-aramid iti entablado iti lubong.

Cadagiti callabes a decada dagiti agipadpadamag impilitda-nga-impacan cadatayo dagiti pannalaysayda cadagiti panagpapatay dagiti agmauyong. Dagiti agsasaruno a panagpapatay ken sapasap a pammapatay a narasay idi casla ngangani gagangay laengen ita.

Ania iti samayna cadatayo ti napinget a pannacaibilagtayo iti casta a kinadakes ken macapadagensen a casasaad? Maysa a samay isu ti panagsagaba iti panunottayo, ammotayo man wenno saan. Ti cancanayon a pannacaiwayang cadagiti panagpagunggan dagiti agmauyong a tattao narigat unay cadagiti nataengan, ngem ad-adda a macaparigat cadagiti naganus-a-nakem dagiti agtutubo cadagiti agdursur-as nga edadda.

Nupay ta di-mabalin a salacnibantayo dagiti annactayo iti tunggal di-macaay-ayo a paset ti gimong, ti pannacaibilagda cadagiti nacaad-adu a kinarungsot iti nasapa a biagda ti macadadael iti ricnada. Ti maulit-ulit a pannacaibilag iti kinarungsot – napaypayso wenno panagincucunna laeng – cadagiti pagiwarnac wenno cadagiti pagraragsacan, patangkenendatayo iti pudpudno a panagsagaba dagiti sabsabali.

MAILAWLAWAGTAYO CADI AMIN A PANAGSAGABA?

Nalabit ti panagsagaba a caricutan nga itarusan isu dayta casla awan ti paggapuanna ken di-maawatan a rason. Masapul nga ammoentayo a ti tunggal didigra mapasamac a ditay matengngel ken ditay pulos mabalinan a sirmataen. Cadagiti cacasta a casasaad idagadag ti Nasantoan a Surat cadatayo iti panagcararagtayo, kiddawentayo iti Dios nga iccatenna wenno pabang-arannatayo iti paricut wenno tulongannatayo a mangisayangcat iti kinaricut ken tapno macasursurotayo babaen dayta.

Ti Namarsua cadatayo iti kinasiribna saanna nga ited a cancanayon iti sungbat a cayattayo. Narasay nga ipalgacna ti nasinnunuo a rason para iti pangngeddeng nga aramidenna. Ngem adda latta naimbag a rasonna.

Cas pangarigan, insalacan ti Dios ni Pablo iti adu a nacasuotanna, ngem adda maysa a saanna a bimmallaetan numan pay naimpusoan iti panagcararag ni Pablo (2 Corinto 12:7-10). Iti daytoy a banag ti insungbatna ken ni Pablo castoy, “Umanayen kenca ti paraburco; ta napigpigsa ti pannacabalinco no nacapsutca” (versiculo 9).

Iti daytoy a daras, ti pannacapabileg iti paset ti espiritual a pangmatmatan wenno cababalin ni Pablo iti camaudianan napangpangruna ngem iti personal a paggin-awaanna.

Daytoy a pagulidanan macatulong coma cadatayo a macaawat a ti pamingmingan ti Dios naigiddiat cadatayo (Isaias 55:8-9; 2 Pedro 3:8). No dadduma isaadna ti lecsion ti cababalin cadagiti naisupadi a casasaad iti ngatoen ti pisical ken mental a gin-awatayo. Cadagita casta a tiempo nalabit panunotentayo a saan a denggen ti Dios dagiti cararagtayo, ngem timudenna ida. Isuna laeng ta masansan a ditay cayat nga aclonen a ti sungbatna saan wenno saan pay – wenno, cas iti casasaad ni apostol Pablo, “Adda nasaysayaat a banag iti panunotco para kenca.”

Masapul a siputantayo iti cari ti Dios a pulos dinatayo suoten iti labes ti cabaelantayo nga ibturan (1 Corinto 10:13). Nangisaad ni Pablo iti nacascasdaaw nga pagulidanan. Basta nagtalcanna iti sirib ti Dios ket inkeddengna nga ituloyna nga aramiden ti trabaho a nangayabanna kencuana.

No madagsenantayo iti panagsagaba a saan a balictaden ti Dios – nangruna no nagtaud cadagiti casasaad a ditay matengngel – masapul a surotentayo daytoy nasimbeng a biblical a pammagbaga ni Pedro, “Ngarud, dagiti agsagaba gapu ta isu ti pagayatan ti Dios cadacuada, italecda coma dagiti cararuada iti Namarsua a mangtungpal cadagiti carina, babaen ti panagaramidda iti naimbag” (1 Pedro 4:19).

Paliiwenyo ti nagcaysa a disso ti panagsagaba a pampanunoten ni Pedro: “Nagasatcayo no mapabainancayo gapu ta pasurotnacayo ni Cristo; addan cadacayo ti nagloriaan nga Espiritu ti Dios. Awan coma ti agsagaba cadacayo gapu iti pammapatay, panagtacaw, panagaramid iti dakes, wenno iti panangpataud iti riri. Ngem no adda agsagaba agsipud ta Cristiano, saan coma nga agbain, no di ket agayaman iti Dios iti caadda ti nagan ni Cristo kencuana” (versiculo 14-16).

No iti panagsagaba ti tunggal tao nagtaud iti bucodna a panagsalungasing iti nasinnunuo a linteg, nasaysayaat nga itarusan ken aclonen a cas nalinteg a bungana. Ngem narasay iti casta a kinalacana.

Iti pannangtedna cadatayo iti wayawaya nga agpili, nangted met ti Dios cadatayo iti waya a mangaclon wenno mangiwacsi iti pangiwanwanna, ti mangpili iti panagsukir wenno isusuco, a mangaramid iti minamaag wenno nasirib a pangngeddeng. Iti panangaramidtayo iti casta inniccanna ti tunggal maysa cadatayo iti di-naituding a masacbayan.

Siwayawayatayo nga agmaneho nga awanan annad wenno calpasan ti panaginum iti nalablabes, siwayawaya nga agibelleng cadagiti macasabidong a kemical cadagiti aglawlawtayo, siwayawaya a saan a mangan iti maiparbeng. Tunggal maysa cadatayo addaan iti casta a wayawaya a cas met cadagiti caarruba ken dadduma pay iti aglawlawtayo. Amin dagiti tignaytayo – ken cadacuada – adda pagbanaganda. No dadduma agsagabatayo gapu cadagiti bucod-a-pangngeddengtayo, no dadduma ti caarrubatayo – wenno agpinallatipat. Ti wayawaya nga agpili nacascasdaaw a sagut, ngem maysa a pagannungan a manmano ti nasayaat a panangtengngeltayo, cas mapanecnecan babaen ti naladingit, agsagsagaba a lubongtayo.

Daytoy ti mangted iti dadduma a pannacaawat cadatayo no sapay a dagiti awan-basolda, agraman dagiti ubbing, no dadduma agsagabada cas banag ti saan-a-husto a pili dagiti sabsabali. Cadagita a daras isu ti pannacasapultayo unay ti macapagin-awa a tulong ti naayat a Dios ken ti panangsarurong dagiti familia ken gagayyemtayo.

Awan cadatayo ti di samayen ti bunga dagiti aramidtayo – datayo ken dagiti sabsabali. Ti tao a macapatanor iti sakit a di-masurotan a nagtaud iti nasinnunuo a cabucbucodanna a cababalin ken ti maladaga a nayanac nga adda sakit ti pusona agpadpadada nga agsagaba, nupay ta saan a masapul a nagtaud iti aniaman nga inaramidda.

Dagiti nadangranan wenno natay iti acsidente wenno gagangay a didigra masansan met nga awan ti nakibianganda a bictima. Saan nga amin a panagsagaba naigapu iti bunga ti personal a kinasukir wenno di-rumbeng a cababalin ti agsagaba. Uray cadagiti Sangapulo a Bilin ipalpalagip ti Dios cadatayo a dagiti bunga dagiti biddut nga aramidtayo mabalin a samayenda dagiti caputotantayo iti adu a sumarsaruno a caputotanda (Exodo 20:5).

Masansan a saan a mailawlawag ti nasinnunuo a nagtaudan ti panagsagaba – saan a ti unos daytoy a biag. No dadduma ti casayaatan nga aramidentayo isu ti panangaclon iti dayta a cas mailawlawag laeng babaen ti aw-awagan ti Biblia iti “tiempo ken naiparparna” (Eclesiastes 9:11). Nupay ta saan a patauden ti Dios iti disgracia, casta met a dina binsabinsaen a tarawidwidan ti biag ti tumunggal tao tapno maliclicanna ida. Ibaga ni Pablo cadatayo a ti daytoy a biag sumirsiriptayo iti “nacudrep a sarming” (1 Corinto 13:12). Saantayo pulos matarusan ti dadduma a bambanag iti unos ti panagbiagtayo, no dinto iti sabali a lubong a sumangbay.

Masapul coma nga ammoentayo nga uray ti panagsagaba a cas bunga ti tiempo ken naiparparna saan nga awan ti nagtaudanna. No saan a maisinggalut iti nasinnunuo a cababalin, uray pay casta masansan a cas bunga ti maysa wenno ad-adu a tabas ti cababalin a sinursurot ti sangcataoan manipud idi panamarsua.

Pinili ni Adan, babaen ti panagbasol, ti timmallicud iti Dios. Amin a sangcataoan sinurotda daytoy a dalan. “Immay ti basol ditoy lubong gapu iti maysa a tao, ket incuyog ti basolna ti ipapatay. Iti casta, nagsacnap ti ipapatay ti amin a tao ditoy lubong, agasipud ta nagbasol amin a tao” (Roma 5:12).

Maysa cadagiti nagbanagan ti pangngeddeng ti sangcataoan nga agbiag a maibusor iti pannursuro ti Dios isu ti lubong nga iturturayan ti kinabarengbareng ken pagayatan ti “tiempo ken naiparparna” ken cadagiti tigtignay dagiti sabsabali. Daytoy a tabas agtultuloy aginggat’ agsubli ni Cristo a mangipasdec iti Pagarian ti Dios ditoy daga. Ti entero a lubong mapnonton iti pannacaammo iti Dios ken dagiti nalinteg a linlintegna (Isaias 11:9). Amin a sangcataoan agbiagdanton iti lubong nga husto ken nalinteg.

TI AKEM NI SATANAS ITI PANAGSAGABA

Iti panamati ken ni Satanas a diablo cas napaypayso a parsua saan a nasayaat [a denggen] dagiti adu a bunggoy. Uray iti Estados Unidos, a gagangay nga ayan ti panamati iti diablo, dagiti panagbibilang ipakitada a caaduan dagiti Americano saan a mamati ken Satanas cas napaypayso, agbibiag a parsua. Adu dagiti mangpanunot a ti diablo maysa laeng a simbulo iti kinadangkes ti tao iti padana a tao wenno ti pannacabagi ti sapasap a kinadakes.

Nupay casta, ti Biblia iparangarangna ni Satanas a cas napaypayso a parsua – ti espiritu nga addat’ naindaclan a pannacabalinna a mangdangran. Gapu ta adu dagiti mangiwacsi iti caadda ti napaypayso a diablo, isu a saan a mabigbig a pagtaudan ti adu a panagsagaba. Nupay ammotayo wenno saan, ti panangallilawna iti sangcataoan dackel a pagtaudan ti panagrigat ken panagladingit.

Ti calawa ti panangallucoy ken pannacabalin ni Satanas silalawag a naipalgac iti Biblia. Ti Paltiing 12:9 ibagana cadatayo nga isu “ti mangal-allilaw iti entero a lubong.” Insurat ni Juan iti sabali pay a disso nga “adda ti entero a lubong iti babaen ti turay ti Managdacdakes” (1 Juan 5:19). No idarirag ni Pablo a “kinullaapan ti dios daytoy a lubong ti isipda, ket dina ipalubos a makitada ti silaw nga aggapu iti Naimbag a Damag maipapan iti dayag ni Cristo a ladawan ti Dios” (2 Corinto 4:4), ipatpatuldona ti diablo.

Ballaagan ni Pedro dagiti Cristiano nga “Agsalucagcayo. Agsiputcayo. Agdacdakiwas ti Diablo a cabusoryo cas maysa a ngumerngernger a leon nga agsapsapul iti alun-onenna” (1 Pedro 5:8). Iti pangngarig iti agisabsabuag ken ti bukel, ibaga ni Jesus cadatayo nga apaman a mangngegan dagiti tattao iti Sao ti Dios a mailawlawag cadacuada, “dagusen ni Satanas ti umay mangiccat iti sao a nangngegda” (Marcos 4:15). Daytoy dakes a parsua cayatna a macullaapan ti sangcataoan iti gin-awa, pammakired ken panangisalacan ti kinapudno ti Dios.

Babaen ti espiritual a panangullaap ken panangpanengneng ni Satanas nga indas-alna iti lubong, isu ti nangirussuat iti di-matucod a panagsagaba. Kinullaapanna ti sangcataoan iti rason ti caaddatayo. Inallilawna dagiti tattao a patienda a ti wagasna – ti wagas ti kinaimbucodan ken panagbasol – isut’ nasaysayaat ngem ti panagtulnog cadagiti bilbilin ti Dios. Nacalcaldaang ta, natnag ti sangcataoan a bictima cadagiti panagipampamarang ni Satanas, ket saanda a mapanunot iti camaudian a ladingit a patauden ti basol.

Iti entero a pacasaritaan ti lubong nagballigi ti diablo iti panangsulisogna cadagiti tattao nga agpapasda cadagiti saan a nalinteg ken immoral nga ar-aramid ti pisical a kinarawet [kinaderrep]da. Inaramatna daytoy a pamay-an idiay Hardin ti Eden, ket nagandar daytoy nga ay-ayamna a di nagpaltos nanipud idin. Tunggal maysa nagsagaba gapu iti dayta.

Insalaysay ni Jesus a ti diablo “Mammapatayen manipud idi damo...” (Juan 8:44). Ti panggep ni Satanas isut panangaramidna iti nataoan a biag a nacarigrigat ket iti camaudian dadaelennatayo. Ti mismo a casasaadna managdadael, ket dagiti agar-aramid cadagiti pannignay a macadadael dida mapupuotan a sumursurotda kencuana. Cuna ti Paltiing 9:12 a ni Satanas “isu ti anghel a mangbambantay iti nacaun-uneg a yuyeng. Abaddon ti naganna iti Hebreo, ket Apolion met iti Griego (cayatna a saoen, ‘ti Mangdadael’)” (Paltiing 9:11). Dagitoy dua a nagan caipapananda iti “panagdadael” ken “agdadael.” Iti pannacaisupadi ti Dios, a manamarsua, manaraken ken mangted-biag, ni Satanas isut cangatoan a managdadael ken mammapatay.

Ni Satanas isut mangkibkibor iti panaggugubat ken panagririri. Iladawan ti libro ti Paltiing dagiti demonio nga espiritu iti canibusanan ti panawen, “Isuda dagiti espiritu ti demonio nga agiparparang iti milagro. Mapan dagiti tallo nga espiritu cadagiti ari iti entero a daga, tapno urnongenda ida a makigubat inton dumteng ti naindaclan nga aldaw ti Mannacabalin-amin a Dios” (Paltiing 16:14). Ni Satanas ken dagiti demoniona irussuatda ti tiempo ti rigat a naal-alingget ngem ti aniaman a panagdadael a napadasen dagiti nataoan a parsua (Mateo 24:21-22).

Makitatayo cadagitoy a versiculo a ni Satanas igaedna ti macadadael a pannacabalinna iti sangcataoan. Saan a palubosan ti Dios ni Satanas a mangatipa iti plano-maestrona para ti pannacaisalacan ti sangcataoan. Cas isut Amatayo ken “Apo ti langit ken daga” (Mateo 11:25), ti Dios dina pulos ilusulos ti cangatoan a pannengngelna iti sangcataoan ken ti entero a pinarsuana.

DAGITI PASPASAMAC SUCOGENDA TI CABABALIN TI MASACBAYAN A PRESIDENTE

Ni Teodoro Roosevelt, maica-26 a Presidente ti Estados Unidos, napapigsa babaen ti panagsagabana. Naparaburan iti napartac ken mannacabael nga isip, ngem addaan iti masacsakit a bagi. Agsagsagaba iti macaidalit nga asma.

Idi sangapulo ket dua ti tawenna kinuna ti amana kencuana: Teodoro, adda isipmo, ngem awan ti bagim ket no awan ti tulong ti bagi iti nakem saan a macaadayo a cas rebbengna coma...Masapul a patanurem ti mismo a bagim...ngem ammoc nga aramidem.” (David McCullough, Mornings On Horseback, 1981, p. 112).

Ni Teddy, cas naingungot a pangawag dagiti Americano kencuana, sinaritana iti gayyemna iti samay ti pammagbaga ni amana kencuana. Babaen cadagiti palpalawag ni amana naimatanganna iti bagina a maysa a nacapuy a tao, isu nga aramidenna ti bagina a napigsa.

Rinugianna a dagus ti programat’ panangpabileg ti bagina. Naganetget ni Teddy a nangpadur-as iti salun-atna. Nagbanag ti kinaganetgetna iti panagbalin ti bagina a napigsa a saanen a sarangten ti asma.

Ngem saan a nagbayag nagsagaba ni Teddy Roosevelt iti dacdackel a pannacasuot idi naggiddan a pimmusay ti inana ken ti ubing pay nga asawana. Dua nga aldaw sacbay dayta, nagpasngay ti asawana iti babai a maladaga. Saanna pulos mailawlawag iti casta a didigra. Kinunana nga awan ti ammona nga isungbat malacsid, “Isut pagayatan ti Dios” wenno “Nacascasdaaw ken nacaal-alingget a gasat.” (ibid., p. 285).

Nupay ta cuna dagiti dadduma a mannurat iti cabibiag a dina nalasatan nga entero dayta a didigra, sinarangetna ti pangngaritna ket nagballigianna ti dagensen a nangcumot kencuana.

Numan pay ta nacalcaldaang ti ipapatay ni asawana nga agtawen la ti 22, simmaranta ket nagturong iti nailian a kinalatac. Adda dagiti nagpaliiw a no saan a nagsagaba iti castoy a wagas nalabit di pulos nagbalin a President ti Estados Unidos. Ni Theodore Roosevelt, cas cadagiti dadduma, nagtignayanna dagiti pannuot ken panagsagaba babaen ti panangragpatna iti ad-adu ngem ti nagun-odna coma no saan a napasamac dagidiay a pannuot.

“NAITUDING A MATAY TI TAO ITI MAMINSAN”

Manmano a cayattayo a panunoten ti patay – ipapataytayo wenno ti sabali. No matay ti ingungotentayo agladingittayo – cas aramidentayo coma.

Nupay casta, nalawag a ti bagitayo saan a natabas nga agpaut nga agnanayon. Iti Hebreo 9:27 ibagana cadatayo a “Naituding a matay ti tao iti maminsan...”

Saan a tinabas ti Dios iti bagitayo nga agpaut iti ad-adu ngem sumagmamano a decada. Ipalagip ti Salmo 90:10 cadatayo a “Pitopulo la a tawen ti panagbiagmi, wenno walopulo, no nasalun-atcami.” Iti panagdur-as dagiti ag-agas, ospital ken tecnolohia bayat ti napalabas a siglo, ti caunday ti biagtayo agpada met laeng idi naisurat daytoy a salmo sumagmamano a ribu a tawen ti naglabasen. Adda dadduma nga agbiag sumuroc-cumurang, ngem dayta laeng ti manamnama ti caaduan cadatayo. Iti ababa a pannao, ababa unay a pangraritan iti tiempo cadagiti bambanag a, iti camaudianan, saan a castat kinapangrunada.

Saantay coma a masdaaw no agtuctoc ti patay iti ruangan. Basta isu latta dayta ti nacaparsuaantayo. Cas iti ruot a dumackel ket malaylay, ken dagiti sabsabong iti tanap agucradda iti sumagmamano nga aldaw ket casta met ti cabiitda nga agcupas, isu a casta met ti panagrangpayatayo sacbay a manglaylay ken mataytayo (Isaias 40:6-8). Ti pisical a bagitayo lumacay wenno bumaket ken agrunot. Saan a tinabas ti Dios ida nga agpaut nga agnanayon.

Nupay casta, saan a saoen daytoy a daytoy ti pagpatinggaan. Ni matalec a Job ammona nga aginana iti tanem agingga ti umay a panagungar. “O Dios, ilemmengnac coma iti lubong dagiti natay: wen, ilingednac coma agingga nga agbaaw ti pungtotmo; calpasanna, tudingam ti tiempo a pananglagipmo caniac. No matay ti tao, agbiagto aya manen? Ngem mangnamnamaac iti nasaysayaat a tiempo; agingga nga agpatingga daytoy agdama a rigatco. Calpasanna, ayabannacto ket sumungbatac; maay-ayocanto caniac a parsuam” (Job 14:13-15).

Nupay ta naldaang ti ipapatay, saan nga isu ti paggibusan iti namnama. Icari ti Dios iti panagungar iti kinaagnanayon para cadagiti matalec nga adipenna a makipagturay ken ni Jesu Cristo ken tumulongda Kencuana a manarawidwid iti Pagarian ti Dios (1 Corinto 15:50-54; Paltiing 20:4-6; 5:10).

Para cadagiti saan a nacaammo wenno nangaclon ken ni Cristo, nangidiaya ti Dios iti sabali a panagungar iti maud-udi a tiempo tapno isuda, met, masursuroda ti kinapudno ti planona ket awatendanto ti sagut ti panangisalacanna. (Masursuroyo ti ad-adu maipapan daytoy iti maudi a capitulo daytoy a libreta).

Para iti dacdackel a pannacaawat no ania ti ipalgac ti Biblia, kiddawenyo ti libre a copia ti libreta Ania Ti Mapasamac Calpasan Ti Ipapatay? [What Happens After Death?] ken Langit ken Infierno: Ania Ti Napaypayso Nga Isuro ti Biblia? [Heaven and Hell: What Does the Bible Really Teach?]. Agpadada a libre nga aggapu cadagiti oficinami, wenno sarungcaranyo ti Web sitemi iti www.gnmagazine.org.

TI PANNAGNA CADAGITI LUNGULONG TI BIAG

Insurat ni Ari David iti Salmo 23 maipapan iti pannagna “iti lungulong iti anniniwan ni patay.” Nalabit maysa la daytoy a pangiladawan para cadagiti sapasap a pannuot ti biag, ngem maipacat met iti maysa a tao a sangsangoenna ti mismo nga ipapatayna wenno ti ipapatay ti ingungotenna.

Iti daytoy a biag sangoentayo dagiti pannuot. Cancanayon a maibilagtayo cadagiti pannacactang ken pannacadagensen. Nupay casta, mabalintay nga aramaten dagiti adu a pamay-an a mangpabassit wenno mangpalag-an iti dagsen ti aw-awitentayo. Adtoy ti sumagmamano a nasamay nga addang:

Agsursurocayo manipud cadagiti pannuot ken panagsagaba. Macatulongda cadatayo nga agsursuro cadagiti baro a paglaingan. Nacasursuro ni Jesu Cristo babaen cadagiti nariricut a casasaad ken padpadasna (Hebreo 5:8), ket casta met a cabaelantayo.

Bilangenyo dagiti bendisionyo. No ipamaysatayo ti pamingmingantayo iti ut-ot, masansan a malipatantayo no casano ti caimbag ti biag cadatayo. Kinuna ni Pablo nga agyamantayo coma a di-agressat (Filipos 4:6). Inlawlawagna met a ti bunga ti pannangted-yaman isut “talna...a di matucod nga itarusan” (versiculo 7).

Dica pabalud iti bucodmo a panagsagaba. Dagiti nacaro a pannuot mabalin a pagtaudan ti awanan-gaway a ricna. Masapul a di-agsarday ti panagtigtignaytayo gapu ta iti di-panagcutcuti ad-adda a mangdadael iti regtat’nakem. Ni Dr. Paul Brand,

nalaing maipapan iti ut-ot, kinunana: No sangoec ti nacaro nga ut-ot, birukec dagiti tigtignay a pacaipamaysaan ti bagi ken panunotco, ket nasaracac a ti siririing a panangicaso ken ti disiplina ti kinacuti macatulongda a mangbacal iti ut-ot.” (Paul Brand and Philip Yancey, The Gift Nobody Wants, 1993, p. 254).

Sapulem ti maysa [a tao] a makiraman iti dadagsenmo. Adu dagiti tattao nga agdama ti nacaro a pannacasuotda agbiddutda a mangibaclay cadagitoy nga is-isuda. Awan ti riri, a dagiti umasideg cadagiti sabsabali cadagiti tiempo a casapulandat’ tulong maaddaanda iti pagimbagan iti itutulongda. Masapultay iti nataoan a panaglangenlangen. “Ti dua nasaysayaat ngem ti maymaysa... Ngem agalluad ti agmaymaysa no matnag, ta awan ti mangbatac kencuana” (Eclesiastes 4:9-10).

Pirsapirsayem ti pannuot iti babassit a paset. No napalalo iti paricut wenno dadagsenmo, bingaybingayem cadagiti matengngelmo a trabahoen.

In-inutem, saggaysa a paricut iti biag iti inaldaw. Dagiti tattao a sumarsaranget cadagiti dadagsen, panagrigat ti emosion ken ricricut a sapasap masansan a makiramanda iti naabaken-a-nakem. Ibaga ti ricnada a di-agpatingga dagiti pannacasuotda. Cadagita cacasta a tiempo masapultayo iti ugali a macaammo a daytoy a pannuot agpatingganto met – cas cadagiti caaduan a paricut. Alaenyo ti pamingmingan ti cumacanta. “Daytoy ti nacascasdaaw nga aldaw nga inkeddeng ti APO. Agragsac ken agrambactayo” (Salmo 118:24), numan pay adda dagiti paricuttayo.

Saancayo a maupay cadagiti babassit a bambanag. Sursuroenyo ti mangtallicud cadagiti babassit a problema ket aramidenyo dagiti di-unay nasken a pangngeddeng iti cababaan a dagensen ken sicur.

Mangancayo iti natimbeng, macapapigsa a canen. Ti bagi ken nakemtayo basbassit ti baelda nga agibtur cadagiti dadagsen ken dadduma pay a parparicut no ditay iccan ida ti casapulanda a nasustancia a taraon.

Mangwatwatcayo a cancanayon. Ti rumbeng a panagwatwat pucawenna ti dadagsen, mangted ti nasayaat a ricna ken macatulong iti nasimbeng a pannaturog – isuamin dagitoy naskenda para ti pannacapnec ken nasimbeng a panunot.

Iccanyo ti bagiyo ti canayon nga inana ken panagtalna. Imbilin ti Dios nga aginanatayo iti tunggal lawas iti Aldaw a Panaginana. Masapultay met ti tiempo ti panagtalna ti inaldaw-aldaw.

Agbalbaliwcayo. Diyo malisian ti dadduma a macapadagsen a casasaad, ken dagiti dadduma a diyo coma liclican. Agbiddutcayo no liclicanyo ida. Ngem saanyo met nga iranta a pagbuclisan dagitoy a pannusa. No malibasanyo ti pannuot a dicay maawanan iti pagannungan, aramidenyo dayta (kitaenyo ti Proverbio 22:3).

Padackelenyo ti naangaw a ricnayo. “Agtalinaedca a naragsac tapno nasalun-atca. Main-inutca a matay no canayon a nalidayca” (Proverbio 17:22). Ti pannakiangaw macatulong a mangyaltas cadatayo iti ngatoen dagiti dagensen. Natacuatan ni Victor Frankl, bayat ti pannacaipupocna idiay Auschwitz, a ti angaw naisigud nga igam iti pannakidangadang iti pannacalasat [ti ipapatay]. Agpayso a nasamay nga agas iti catawa.

Ammoenyo nga iti camaudianan amin a bambanag addada iti macabael nga ima ti Dios. Iturongnatayo ni Jesus iti Dios: “Ama, cadagita imam yawatco ti espirituc!” (Lucas 23:46). Idagadag ni David cadatayo, “Icumitmo ta bagim iti APO; agtalecca Kencuana ket tulongannaca” (Salmo 37:5). Iti saot’ Hebreo a naipatarus iti “commit” caipapananna “pagtulidan ti dadduma a bambanag.” Ti ladawan-isip a macatulong a mangilawag iti caipapanan daytoy isut’ pannuot iti panangisayyotayo iti bagitayo iti Dios – cas iti panagtaray iti awanan-gaway nga ubing cadagiti nacatanggaya nga im-ima ti amana a nacasagana a mangarucop kencuana.

Impatarus ni: Pedro A. Fabroa (From: “Why Does God Allow Suffering?”, The Good News, May-June 2001)